Исроил бош вазири Биньямин Нетаньяху 19 июнь куни “Эрон режимининг ўзгариши ёки қулаши мақсад эмас, балки натижа бўлиши мумкин”лигини айтди. Бу ҳақда Al Arabiya хабар берди.
“Режимни ўзгартириш ёки унинг қулаши биринчи навбатда Эрон халқи учун муаммо бўлади. Бунинг бошқа иложи йўқ ва шунинг учун мен уни мақсад сифатида тақдим этмадим. Бу натижа бўлиши мумкин, аммо бу бизнинг расмий мақсадимиз эмас”, деди Нетаньяху Исроилнинг Кан жамоат телерадиокомпаниясига.
Унинг айтишича, Исроил Эрон билан урушнинг еттинчи кунида “дунёнинг кўринишини ўзгартирмоқда”. Исроил Эрон ракета учириш қурилмаларининг ярмидан кўпини йўқ қилганини қўшимча қилган.
“Мен Яқин Шарқнинг қиёфасини ўзгартираётганимизни айтган эдим. Энди эса дунёнинг қиёфасини ўзгартираётганимизни айтаман”, деди Нетаньяху.
У Исроил Эроннинг барча ядровий иншоотларига зарба беришга қодирлигини ҳам таъкидлаб ўтган. Бу гап Вашингтон Исроил билан бирга урушга кириш-кирмаслиги ҳақидаги тахминлар фонида айтилган. Нетаньяхунинг қўшимча қилишича, АҚШ президенти Дональд Трамп “Қўшма Штатлар учун яхшилик қилса, у Исроил давлати учун яхшилик қилади”.
Изоҳ (0)