Эрон-Исроил уруши Ғазо секторидаги можарони ҳал этиш бўйича музокараларда эришилган ютуқларни йўққа чиқарди. Бу ҳақда бош вазир маслаҳатчиси, Қатар ТИВ расмий вакили Мажид бин Муҳаммад ал-Ансорий матбуот анжуманида маълум қилди.
“Ғазо секторида эҳтимолий ўт очишни тўхтатиш бўйича бизнинг баҳоларимизга келсак, биз Эрон ва АҚШ ўртасида, шунингдек, (Фаластин ҳаракати) ҲАМАС ва Исроил ўртасида ижобий ўзгаришларни кузатган эдик. Бу ижобий жараён Исроилнинг Эронга ҳужуми туфайли бузилди. Шу боис ушбу ижобий йўналишга қайтишнинг ягона йўли минтақадаги кескинликни юмшатиш ва дипломатик алоқаларни тиклаш йўлларини излашдир. Айни пайтда биз айнан шу масала устида ишламоқдамиз”, дея таъкидлади у.
Эслатиб ўтамиз, 18 март куни Исроил Мудофаа кучлари жорий йилнинг январида ўрнатилган ўт очишни тўхтатиш режимини бекор қилиб, Ғазо секторида жанговар ҳаракатларни қайта бошлади. Қатар, Миср ва АҚШ воситачилигидаги бир неча босқичли музокаралардан сўнг Фаластиннинг ҲАМАС ҳаракати ва Исроил яраш шартларини келиша олмади.
Исроил 13 июнга ўтар кечаси Эроннинг ядро дастурига қарши “Исёнкор шер" операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)