Покистон армияси раҳбари, фелдмаршал Асим Мунир Оқ уйда Америка Қўшма Штатлари президенти Дональд Трамп билан яккама-якка учрашув ўтказди. Суҳбат 2 соатдан кўпроқ давом этган. Бу ҳақда покистонлик ҳарбийларга таяниб Al Jazeera хабар берди.
Inter-Services Public Relations’нинг эълон қилишича, дастлаб бир соатга мўлжалланган учрашув 19 июнь куни Вазирлар Маҳкамаси хонасида тушлик пайтида бўлиб ўтган, сўнгра Овал кабинетда давом этган.
Мунир Трампнинг май ойида икки ядровий қуролли қўшни ўртасидаги 4 кунлик можародан сўнг Ҳиндистон ва Покистон ўртасида ўт очишни тўхтатишга кўмаклашиш борасидаги саъй-ҳаракатлари учун “чуқур миннатдорлик” билдирган. Трамп эса Покистоннинг “терроризм”га қарши ҳамкорлигини олқишлаган.
Оқ уй учрашув ҳақида ҳеч қандай баёнот бермаган, чунки унинг махфий тарзда ўтказилгани айтилмоқда. Трамп Мунир билан музокаралардан сўнг журналистлар билан қисқача суҳбатлашган. У армия бошлиғига миннатдорлик билдириб, “у билан учрашиш шарафига муяссар бўлганини” айтган.
Вашингтон ва Исломобод ўртасидаги кўп йиллик кескинликдан сўнг муносабатларнинг кескин яхшилангани таъкидланган. Трамп Исроил ва Эрон ўртасида давом этаётган ҳарбий можарони ҳам тилга олиб, АҚШ бу урушга қўшилиши мумкинлигини билдирган.
“Покистонликлар Эронни жуда яхши, яъни бошқалардан кўра яхшироқ билади”, деди Трамп.
Таҳлилчиларнинг таъкидлашича, Эрон ва Исроил уруши Покистонни дипломатик мувозанатга мажбур қилади. Исломободнинг Хитой билан яқин муносабатлари ҳам Покистонни зиддиятга тортиши мумкинлиги билдирилган.
Мунир Трамп билан икки давлат ҳамкорликни кучайтириши мумкин бўлган бир қатор соҳалар, жумладан, “иқтисодий ривожланиш, конлар ва фойдали қазилмалар, сунъий интеллект, энергетика, криптовалюта ва технологиялар” ҳақида гаплашган.
Аммо Покистон ҳарбийлари икки етакчи Эрон ва Исроил ўртасидаги кескинлик кучайиб бораётгани ҳақида ҳам “батафсил муҳокамалар” ўтказганини тан олган. Хусусан, урушни тинч йўл билан ҳал қилиш зарурлиги таъкидлангани айтилган.
Покистон 1947 йилда мустақилликка эришганидан бери АҚШнинг яқин иттифоқчиси ҳисобланади. Улар 1979 йилда Совет босқинида, 11 сентябрь ҳужумларида ҳамда АҚШнинг Афғонистонга бостириб киришида яқиндан ҳамкорлик қилган.
АҚШ сўнгги 20 йил ичида Покистонга 30 миллиард доллардан ортиқ ёрдам кўрсатган. Аммо у бир неча бор Исломободни “иккиюзламачилик”да ва хавфсизлик соҳасида ишончли ҳамкор эмасликда айблаган.
Хитой ҳам Покистоннинг энг муҳим ҳамкори ҳисобланади. У билан чуқур иқтисодий, стратегик ва ҳарбий алоқаларга эга. Шу билан бирга, сўнгги 30 йил ичида Пекиннинг глобал суперкучга айланиши уни Вашингтоннинг асосий рақибига айлантирган.
Сиёсатчиларнинг айтишича, иккала куч билан алоқаларни бошқариш Исломободни қийин аҳволга солиб қўяди.
Пекин Ғарбий Хитойни Покистон орқали Араб денгизи билан боғлайдиган йирик инфратузилма лойиҳаси — Хитой—Покистон иқтисодий йўлагига 62 миллиард доллар сармоя киритган.
Ҳарбий жабҳада Покистон ўз қуролларининг 80 фоиздан ортиғини Хитойдан сотиб олади. Бу маҳсулотларнинг баъзилари, хусусан, Хитойнинг самолёт ва ракеталари яқинда Ҳиндистон билан бўлган можарода амалда қўл келган.
Изоҳ (0)