Шимолий Африка давлатлари 9 июнь куни Тунис пойтахтидан Ғазога ёрдам карвони жўнатди. Бу ҳақда Middle East хабар берди.
Бу ёрдам Исроилнинг Фаластин анклавидаги 18 йиллик қамалини бузиш мақсадида амалга оширилмоқда. Жазоир, Миср, Ливия, Марокаш ва Тунисдан келган минглаб кўнгиллилар Ғазодаги гуманитар инқироз ҳақида халқаро хабардорликни ошириш ва ёрдам етказиш учун Тунис пойтахтини 100 та автомобиль карвонида тарк этди.
Бирлашган Миллатлар Ташкилоти Ғазони “Ер юзидаги очарчилик авжига чиққан жой” деб таърифлаган. Мамлакатда ярим миллионга яқин одам очлик, тўйиб овқатланмаслик, касаллик ва ўлим вазиятида.
“Карвон қамалдаги Фаластин халқига бирдамлик билдиради ва уларга гуманитар ёрдам етказади. Унинг аъзолари Тунис—Ливия чегарасидаги Рас Едир ўтиш жойига йўл олади ва Ливия қирғоқ йўли бўйлаб Қоҳирага, сўнгра Ғазодаги фаластинликларга бирдамлик ва ёрдам хабарларини етказиш учун Миср—Фаластин чегарасидаги Рафаҳ ўтиш жойига боради”, дея маълумот берилган.
Араб тилида матонат ва собитқадамлик маъносини англатувчи “Сумуд” колоннаси таркибида касаба уюшмалари ва сиёсий арбоблар, шунингдек, ҳуқуқ ҳимоячилари, спортчилар, ҳуқуқшунослар, шифокорлар, журналистлар ва ёшлар ташкилотлари аъзолари борлиги айтилмоқда. Бироқ карвон ҳақиқатан ҳам қамалдаги Ғазо секторига етиб борадими ёки йўқми, номаълум, Чунки Миср расмийлари ҳали карвонга Шимолий Синайга киришга рухсат бермаган.
“Сиз (Ғазо) ёлғиз эмассиз. Биз сизнинг дардингизга шерикмиз”, деди Жазоир мусулмон уламолари уюшмаси аъзоси шайх Яҳё Сари.
Маълумот учун, 9 июнь куни Исроил кучлари Ғазо сектори блокадасини ёриб ўтишни мақсад қилган Мадлен хайрия кемасини қўлга олган ва унинг 12 кишидан иборат экипажини, жумладан, фаол Грета Тунбергни ҳибсга олганди.
Изоҳ (0)