Исроил бош вазири Биньямин Нетаньяху Иордан дарёсининг Ғарбий соҳилида “Темир девор” номли аксилтеррор операцияси бошланганини эълон қилди.
Исроил ҳукумати раҳбарининг тушунтиришича, операциянинг мақсади Женинда терроризмни илдизи билан йўқ қилишдан иборат. Фаластиндаги “Исломий жиҳод” ташкилотининг ҳарбий қаноти ҳисобланмиш “Сарая ал-Қудс” гуруҳи Исроил ҳужумига қарши турганини маълум қилди.
Нетаньяхунинг қайд этишича, “бу Исроил ҳукуматининг ўз олдига қўйган мақсад — Яҳудия ва Самарияда (Ғарбий Соҳилда) хавфсизликни мустаҳкамлаш йўлидаги яна бир қадамдир”.
“Биз Эрон ўқига қарши, у ўз қуролларини қаерга йўналтирмасин — Ғазоми, Ливанми, Суриями, Яманми, Яҳудия ва Самариями — тизимли ва қатъий ҳаракат қилмоқдамиз”, дейди у.
Исроил армиясининг хабар қилишича, “Темир девор”" операцияси ҳарбийлар, Умумий хавфсизлик хизмати ва чегара полицияси кучлари томонидан амалга оширилмоқда. The Times of Israel нашрининг ҳарбий манбасига кўра, операция Жениндаги террорчи гуруҳлар фойдаланаётган инфратузилмага дронлар ҳужуми билан бошланган ва камида бир неча кун давом этади.
Фаластин Соғлиқни сақлаш вазирлиги хабарига кўра, Исроилнинг Жениндаги операцияси чоғида тўрт киши ҳалок бўлган, 35 киши жароҳатланган.
Исроил ва ҲАМАС ўртасида ўт очишни тўхтатиш битими кучга кирди
Нетаньяхунинг қўшимча қилишича, Исроил “зарурат туғилганда” Ғазо секторида ҳарбий ҳаракатларни давом эттириш ҳуқуқини ўзида сақлаб қолади.
Унинг сўзларига кўра, АҚШ Исроилни Ғазодаги урушни қайта бошлаши учун тўлиқ қўллаб-қувватлайди. Тегишли фикр АҚШнинг амалдаги раҳбари Жо Байден ва сайланган президент Дональд Трамп томонидан билдирилган. Исроил бош вазири Ғазодаги ўт очишни тўхтатиш “вақтинчалик” эканини айтди.
У агар иккинчи босқич бўйича келишувга эришилмаса, АҚШ Исроилга “ҳарбий ҳаракатларга қайтиш ҳуқуқи”ни берганини таъкидлади.
“Музокаралар давомида мен бир нечта принципларни аниқлаштириб олдим: биринчи принцип — агар керак бўлса, жанговар ҳаракатларни тиклаш имкониятини сақлаб қолиш”, деди Биньямин Нетаньяху.
У Исроил армияси ўз контингентини Ғазо сектори ва Миср ўртасидаги чегара зонаси — Филаделфия йўлаги ҳудудида сақлаб қолмоқчилигини айтди.
“Филаделфия йўлагидаги кучларни қисқартириш у ёқда турсин, ҳаттоки уларни бир оз кўпайтирамиз ҳам”, деди у.
Нетаньяху Исроил “урушнинг барча мақсадларини бажаришга” ва “барчани уйига қайтаришга” эришмоқчилигини таъкидлади. Унинг сўзларига кўра, бугунги кунга қадар 157 нафар гаровга олинганлар ҲАМАС асирлигидан қайтарилган, улардан 117 нафари тирик. Исроил ва Фаластин ҳаракати ўртасидаги битимнинг биринчи босқичи доирасида яна 33 нафар гаровдаги исроиллик уйга қайтади.
Изоҳ (0)