Исроил 3 июнь куни Сурияга тегишли қуролларга зарба берганини маълум қилди. Бу ҳақда BBC хабар берди.
“Исроилнинг Сурия жанубига берган зарбалари оқибатида кўплаб инсонлар ҳалок бўлиб, моддий йўқотишларга олиб келди. Исроил минтақани беқарорлаштиришга уринмоқда. Бу кескинлашув Сурия суверенитетининг очиқдан очиқ бузилишини англатади”, деди Сурия ташқи ишлар вазирлиги.
Исроил мудофаа вазири Исраэл Кац яҳудий давлатига учирилган снарядлар учун масъулиятни Сурия президенти Аҳмад аш-Шараъага юклаганини айтган. Икки давлат ўртасидаги кескинликни юмшатиш бўйича сўнгги билвосита музокараларга қарамай, Исроил Сурияга ҳужумларни кучайтирган.
“Шиддатли портлашлар Сурия жанубида, хусусан, ал-Қунайтра шаҳри ва Дераа вилоятида содир бўлди”, деди Буюк Британияда жойлашган Сурия инсон ҳуқуқлари обсерваторияси кузатув гуруҳи.
Ушбу зарбалар оқибатида қанча одам ҳалок бўлгани ёки яралангани номаълум. Асад режими ағдарилганда, Исроил Сурия ҳарбий инфратузилмасини бузиш учун ҳужумлар тўлқинини бошлаганди. Май ойида АҚШ президенти Дональд Трамп 13 йиллик фуқаролик уруши даврида Асадга содиқ кучлар томонидан содир этилган ваҳшийликларга жавобан Сурияга нисбатан ўн йиллик санкцияларни бекор қилиш режаларини эълон қилганди.
Изоҳ (0)