АҚШ президенти Дональд Трамп пўлат ва алюминий импортига божларни икки бараварга — 25 фоиздан 50 фоизга ошириш тўғрисидаги фармонни имзолади. Бу ҳақда BBC хабар берди.
Қарор автомобильлардан тортиб консерва идишларида ишлатиладиган металларнинг импорт солиқларига амал қилади. Трампга кўра, қарор бугун, 4 июндан кучга киради. Бироқ, танқидчиларнинг таъкидлашича, бу чоралар АҚШдан ташқаридаги пўлат ишлаб чиқарувчиларга зарар етказибгина қолмай, мамлакат компаниялари ва саноатига зарар етказиши мумкин.
Аммо Буюк Британияга бу борада вақтинча енгиллик берилди: мамлакат пўлат ва алюминий божлари 25 фоиз этиб белгиланган. Бунга икки мамлакат ўртасида май ойида имзоланган тариф пакти сабаб қилиб кўрсатилган. Буюк Британия ҳукумати вакилининг таъкидлашича, мамлакат бу масалани АҚШ билан яна кўриб чиқиб, тарифлар бутунлай олиб ташланишига ҳаракат қилади.
АҚШ Европа Иттифоқидан кейин дунёдаги энг йирик пўлат импортчиси ҳисобланиб, металлнинг катта қисмини Канада, Бразилия, Мексика ва Жанубий Кореядан импорт қилади. Биринчи президентлик даврида Трамп пўлатга 25 фоиз ва алюминийга 10 фоизлик божлар жорий қилганди.
Изоҳ (0)