13 март куни дунёнинг еттилик гуруҳи давлатлари ташқи ишлар вазирлари ва АҚШ президенти Дональд Трамп Канадада учрашади. Учрашувда Украинага нисбатан янгиланаётган ташқи сиёсат масалалари муҳокама қилинади. Бу ҳақда Reuters хабар берди.
Маълумот ўрнида, G7 давлатларига Буюк Британия, Канада, Франция, Германия, Италия, Япония ва Америка киради. Мамлакатларнинг ташқи ишлар вазирлари гуруҳи Европа иттифоқи билан биргаликда Квебек тоғларида жойлашган Ла Малбаиэ чекка сайёҳлик шаҳарчасида икки кунлик учрашувларда иштирок этади.
Учрашувнинг энг муҳим масаласи АҚШ давлат котиби Марко Рубионинг Саудия Арабистонининг Жидда шаҳрида Киев билан ўтказган музокаралари бўлади. Унда Украина 30 кунлик ўт очишни тўхтатиш келишувини қўллаб-қувватлашга тайёр эканлигини билдирган.
G7 вазирлари Жиддадаги ижобий натижа ҳеч бўлмаганда Украина бўйича музокараларни осонлаштириши мумкинлигини айтди. Бу мамлакатларнинг Украинага нисбатан ташқи сиёсатларини янгилашга йўл очади.
Бироқ Канаданинг раислигидаги биринчи G7 йиғилиши якуний баёнотни тасдиқлаши мураккаб кечмоқда. Бунга АҚШнинг барча пўлат ва алюминий импортига 25 фоизлик божлар жорий этиш тўғрисидаги қарори ҳамда Канада ва Европа иттифоқининг жавоб чораларини эълон қилиши сабаб бўлмоқда. Бу ҳолат мамлакатлар ўртасидаги муносабатни чигаллаштирган.
Америка Қўшма Штатлари президенти Дональд Трамп лавозимга қайтганидан бери Украинага нисбатан камроқ дўстона муносабатда бўлиб, урушни тезроқ тугатиш бўйича келишувга эришишни талаб қилмоқда. Бундан ташқари, Америка ва Россия алоқаларини илиқлаштиришга эришди.
Аммо ҳозирда Канада ва АҚШ муносабатлари ёмонлашган. Бунга Трампнинг Канададан барча импортларга божлар жорий этиш таҳдидлари ва уни АҚШнинг 51-штатга айлантириш ғояси сабаб бўлган.
Биз музокараларда G7 давлатларининг барчасига эътибор қаратамиз. Бу биз Канадани қандай эгаллаб олишимиз ҳақидаги учрашув эмас, деди АҚШ давлат котиби Марко Рубио журналистларга.
Канада ташқи ишлар вазири Мелани Жоли бу жавобдан қониқмади:
Мен ҳар бир учрашувда европаликлар билан АҚШга жавоб божларини мувофиқлаштириш ва америкаликларга босим ўтказиш масалаларини кўтараман, деди у.
Музокаралар икки кун давом этиши белгиланган.
Изоҳ (0)