АҚШ президенти Дональд Трамп Украинадаги можарони ҳал қилиш учун яқин орада россиялик ҳамкасби Владимир Путин билан учрашув ўтказмоқчи. Бу ҳақда Америка етакчиси Давос форумига масофадан туриб қилган мурожаатида маълум қилди, деб хабар бермоқда Reuters.
Бир нарса жуда муҳим. Мен президент Путин билан иложи борича тезроқ учрашиш ва бу урушга чек қўйиш имкониятига эга бўлишни истардим, деди Трамп.
Унинг сўзларига кўра, “бу вазият устидан катта ҳокимиятга эга” бўлган Хитой ҳам можарони ҳал қилишда ёрдам бериши мумкин.
Умид қиламанки, биз биргаликда ишлаймиз ва можарони тўхтатамиз, дея қўшимча қилди Трамп.
АҚШ етакчиси Вашингтоннинг Украинадаги инқирозни тинч йўл билан ҳал қилиш бўйича саъй-ҳаракатлари аллақачон бошланганини айтди. Шу билан бирга, у можарони ҳал қилиш усулларидан бири сифатида нефть нархини арзонлаштиришни қайд этди. Трампнинг фикрича, бу АҚШда инфляцияни пасайтиришга ва Украинадаги можаро муносабати билан Россияга босим ўтказишга ёрдам беради.
Мен Саудия Арабистони ва ОПЕКдан нефть нархини пасайтиришни сўрайман. Агар нефть нархи пасайса, Россия ва Украина уруши дарҳол тугайди! Ҳозир бу уруш давом этиши учун нарх етарли даражада юқори, деди Трамп.
Бир кун аввал АҚШ президенти агар Москва Украина бўйича музокаралар столига ўтирмаса, Россияга қарши санкцияларни кенгайтириш эҳтимоли ҳақида огоҳлантирганди.
Унинг таъкидлашича, АҚШ бутун Россия экспортига юқори божлар жорий қилиши мумкин ва келишувга қисқа муддатда эришиш кераклигини таъкидлади. Шу билан бирга, Трамп Россияга зарар етказмоқчи эмаслигини қўшимча қилди.
Изоҳ (0)