Суриянинг ўтиш даври президенти Аҳмад аш-Шараъа сентябрда АҚШга ташриф буюради. Бу ҳақда Syria TV телеканали хабар бермоқда.
Қайд этилишича, аш-Шараъа БМТ йиғилишида ҳам сўзга чиқади. Бу Сурия президентининг сўнгги 60 йил ичида жаҳон ташкилотидаги илк нутқи бўлади.
Суриянинг муваққат ҳукумати 2024 йил 9 декабрда, Башар Асад режими қулашидан сўнг ташкил этилган эди. 2025 йил 29 январда қонун чиқарувчи ҳокимиятнинг олий органи бўлмиш Халқ кенгаши расман тарқатиб юборилди ва Ўтиш даври ҳукумати Муваққат қонунчилик кенгашига сайловлар ўтказилишини эълон қилди. 2025 йил 29 мартда биринчи ўтиш даври ҳукумати ўз фаолиятини якунлаб, ўрнини иккинчи ўтиш даври ҳукуматига бўшатиб берди. Бош вазир лавозими бекор қилинди ва ҳукуматни Сурия президенти бошқара бошлади.
Апрель ойида Сурия ташқи ишлар вазири Асад аш-Шайбоний Нью Йоркдаги Бирлашган Миллатлар Ташкилоти (БМТ) қароргоҳи биносида ўз мамлакатининг янги байроғини кўтарди. У бу воқеани “тарихий” деб атади. Дипломатнинг сўзларига кўра, сурияликлар бу қадамни 14 йил давомида кутишган. ТИВ раҳбарининг БМТ қароргоҳига ташрифи Суриянинг юқори мартабали делегацияси 20 йилдан ортиқ вақт ичида биринчи марта Халқаро валюта жамғармаси ва Жаҳон банки вакиллари билан учрашувларда иштирок этганидан сўнг амалга оширилди.
Май ойи ўрталарида АҚШ президенти Дональд Трамп Саудия Арабистонида аш-Шараъа билан ўтказилган учрашувни шарҳлаб, Суриянинг янги раҳбари “бақувват йигит” ва “кучли ўтмишга эга курашчи” эканини таъкидлади. Шунингдек, Америка раҳбари Сурияга қарши жорий этилган санкцияларни бекор қилиш тўғрисидаги қарорини эълон қилди ва буни “унга имконият бериш зарурлиги” билан изоҳлади.
29 май куни АҚШ президентининг Сурия бўйича махсус вакили Томас Баррак 2012 йилда элчихона ёпилганидан бери илк бор АҚШ элчиси қароргоҳи устида Америка байроғини кўтарди.
Изоҳ (0)