Америка Қўшма Штатлари президенти Дональд Трамп 4 июнь куни хорижлик талабаларнинг Гарвард университетига ўқишга киришига тўсқинлик қилувчи қонунни имзолади. Бу ҳақда Euronews хабар берди.
Имзоланган фармойишда Трамп Гарвард хорижлик талабаларни қабул қилишда давом этиши миллий хавфсизликка таҳдид солишини айтган.
“Чет эл фуқароларининг АҚШга кириши мамлакат манфаатларига зарар етказади. Менинг фикримча, Гарварднинг хатти-ҳаракатлари уни чет эллик талабалар ва тадқиқотчилар учун номақбул жойга айлантирди”, деб ёзган Трамп буйруқда.
Бунга Оқ уйнинг университет билан адоватининг янада кучайиши сифатида қаралмоқда. Федерал суд ўтган ҳафта Ички хавфсизлик вазирлигига халқаро талабаларни Гарвардда ўқишдан четлатишни тақиқлаганди.
Гарвард 4 июньга ўтар кечаси берган баёнотида хорижлик талабаларини ҳимоя қилишда давом этишини айтганди. Бу қарама-қаршилик Гарварднинг федерал ҳукумат томонидан қўйилган бир қатор талабларга бўйсунишдан бош тортгани билан боғлиқ.
Гарвардда таҳсил олаётган хорижлик талабалар ҳозирда 6800 га яқин. Трампнинг айтишича, АҚШ давлат котиби Марко Рубио уларнинг визалари бекор қилиниши ёки бекор қилинмаслигини ҳал қилади.
Янги буйруқ 6 ойга мўлжалланган. Шунингдек, Трамп маъмурияти буйруқни янгилаш ҳуқуқини ўзида сақлаб қолади ва бу борада 90 кун ичида қарор қабул қилади.
Изоҳ (0)