Канада ҳукумати бошпана сўровларини чеклаш ва ҳукуматга иммиграция аризаларини кўриб чиқишни тўхтатиш учун кўпроқ ваколат бериш тўғрисидаги қонун лойиҳасини таклиф қилди. Бу ҳақда BBC хабар берди.
Канада иммиграция вазири Лена Диабнинг айтишича, “Кучли чегаралар тўғрисида”ги қонун уюшган жиноятчилик, ноқонуний гиёҳванд моддалар ва қуроллар оқимини чеклаш, иммиграция тизимини кучайтиришга қаратилган.
Таклиф полицияга мамлакатнинг АҚШ билан чегарасини кузатиш учун кўпроқ ваколат беради. Шунингдек, Канадада бир йилдан ортиқ бўлганларга бошпана сўраш тақиқланиши мумкин. Қонун лойиҳасида ҳукумат почтани очиш ва текшириш имкониятини кенгайтириш банди ҳам бор. Бунга танқидчилар салбий фикр билдириб, бу фуқаролик эркинликларига путур етказиши ҳақида огоҳлантирган.
Собиқ бош вазир Жастин Трюдонинг ҳукумати иқтисодий ўсишни рағбатлантириш учун иммиграцияга таянган. Шунга асосан, Канадага вақтинчалик ишчилар ва талабалар кириши рағбатлантирилган.
Сўнгги вақтларда Канадада бошпана сўровлари сони кескин ошиб, аризачилар икки йилгача кутишга мажбур бўлмоқда. Апрель ойида бўлиб ўтган федерал сайловларда ғалаба қозонган бош вазир Марк Карни Канададаги барқарор бўлмаган иммиграция даражасини бартараф этишга ваъда берган.
Янги қонун ҳукуматга жамоат саломатлиги ёки миллий хавфсизлик хавфи туғилганда аризаларни кўриб чиқишни тўхтатиш ваколатини беради. 127 саҳифалик ҳужжатда тергов мақсадида почталарни текшириш ҳуқуқи кенгайтирилади. Шунингдек, 7300 доллардан ортиқ нақд пул операциялари ва бошқаларнинг ҳисобига пул ўтказмалари чекланади.
Изоҳ (0)