AQSH prezidenti Donald Tramp Ukraina Qurolli kuchlari dronlarining Rossiya aerodromlariga hujumi va Moskvaning ehtimoliy javobi Ukrainadagi tinchlik jarayoniga zarar yetkazishi mumkinligidan xavotirlanmoqda. Bu haqda AQSH prezidentiga yaqin manbalarga tayanib, Axios xabar berdi.
“Dronlar hujumi uni hayratga solmadi, chunki bu mojaro davom etayotganda yuz beradigan hodisa, ammo u bu jangovar harakatlarning cho‘zilishiga olib kelishidan xavotirda. U jangovar harakatlar to‘xtashini istaydi, shuning uchun bunday hujumlar sodir bo‘lganda u tashvishga tushadi”, dedi Oq uyning nomi oshkor etilmagan amaldori.
Prezidentning ishonchli vakillari doirasidagi boshqa manbaga ko‘ra, Tramp Moskvaning ehtimoliy javobi uning diplomatik tashabbusini sekinlashtirib qo‘yishidan xavotirda.
Tramp Ukraina Qurolli kuchlarining Rossiya aerodromlariga hujumini zo‘r deb baholagan. Ta’kidlanishicha, Oq uy rahbari hujumni “ancha kuchli” deb ham e’tirof etgan.
“O‘rgimchak to‘ri” operatsiyasi
Ukraina Xavfsizlik xizmati 1-iyun kuni Rossiyaning beshta aviatsiya bazalariga qarshi keng ko‘lamli maxsus operatsiya o‘tkazdi. Uning maqsadi Rossiya strategik aviatsiyasini, xususan, Ukraina shaharlariga muntazam ravishda hujum qilgan qanotli raketa tashuvchilarini ishdan chiqarish edi.
Operatsiya bir yarim yildan ko‘proq vaqt davomida tayyorlangan va puxta rejalashtirilgan. Hujumlar Rossiyada to‘xtab turgan yuk mashinalaridan uchib chiqqan dronlar yordamida amalga oshirilgan. Bu esa Ukraina chegarasidan uzoq masofada zarbalar berishga imkon bergan.
G‘arb ekspertlari fikricha, bu operatsiya urushda burilish nuqtasi bo‘lishi mumkin va Ukrainaning Rossiyaning strategik obyektlariga zarba berish qobiliyatini namoyish etadi. Operatsiyaga 117 ta dron jalb qilingan. Ular Rossiyaning strategik qanotli raketa tashuvchilarining 34 foizini yo‘q qilgan.
Zelenskiy operatsiyaning “ofisi” Rossiya viloyatlaridan birida Federal xavfsizlik xizmati boshqarmasi yonida joylashganini aytgan. Ukraina prezidenti “noyob operatsiya” uchun xavfsizlik xizmati xodimlariga minnatdorlik bildirgan.
AQSH prezidenti Donald Tramp rossiyalik hamkasbi Vladimir Putin bilan 4-iyun kuni telefon orqali muloqot qildi. Suhbatda tomonlar Ukrainaning “O‘rgimchak to‘ri” nomi ostida Rossiya harbiy aerodromlariga qilgan operatsiyasini ham muhokama qildi.
Muloqot davomida Putin Ukrainada yaqin orada tinchlik bo‘lishini kutmaslik kerakligini bildirgan. Shuningdek, u Moskva aerodromlariga uyushtirilgan hujumga javob qaytarilishini ta’kidlagan.
Izoh (0)