АҚШ давлат котиби Марко Рубио 3 июнь куни Марказий Американинг бир қанча номи ошкор этилмаган ҳукумат амалдорлари учун виза чекловларини эълон қилди. Бу ҳақда Reuters хабар берди.
Рубиога кўра, қарор мажбурий меҳнат ва кубалик ишчиларни эксплуатация қилиш элементларини ўз ичига олган “Куба тиббий миссияси” дастури билан боғлиқ. У амалдорларнинг шахсини маълум қилмаган.
“Куба ишчи кучи экспорти дастури иштирокчиларни таҳқирлайди, коррупциялашган Куба режимини бойитади ва аҳолини ўз ватанларида асосий тиббий ёрдамдан маҳрум қилади”, дейилади Рубио баёнотида.
Куба Ташқи ишлар вазирлиги бунга муносабат билдирмаган. Гавана ўнлаб йиллар давомида бундай айбловларни рад этиб келган. Рубио февраль ойида кубалик ишчиларни, хусусан, соғлиқни сақлаш ходимларига виза чекловларини киритганди. Уларнинг кубалик амалдорлар билан алоқаси борлиги тахмин қилинган.
Куба соғлиқни сақлаш тизими шифокорлар ва тиббиёт ходимларини бутун дунёга юбориш орқали катта даромад кўради. 1959 йилдаги сўл инқилобдан бери Куба бирдамлик учун бутун дунё бўйлаб табиий офатлар ва касаллик ўчоқларига шифокорларни юборган. Сўнгги ўн йилликда улар Гаитидаги вабо ва Ғарбий Африкадаги эбола билан курашган.
1959 йилги инқилобда Фидел Кастро ҳокимиятни қўлга киритганидан бери Қўшма Штатлар ва Куба ўртасидаги муносабатлар кескинлашган. Ўнлаб йиллар давомида АҚШ савдо эмбаргоси амалда бўлган. АҚШнинг собиқ сенатори ва 1950 йилларда Кубадан Флоридага келган муҳожирларнинг ўғли ҳисобланган Марко Рубио Барак Обама маъмурияти давридан бери Гавана билан нормал муносабатларга қарши бўлган.
Изоҳ (0)