Трампга доим номаълум рақамлардан қўнғироқ келади, у эса ҳар сафар жавоб беради — ОАВ

АҚШ президенти Дональд Трамп бегона рақамлардан қўнғироқлар бўлса, уларга доим жавоб беради. Бу ҳақда манбаларга таяниб Тhе Atlantic хабар берди.

Мавжуд хавфсизлик протоколларига зид равишда Трамп президент учун мўлжалланган махсус ҳимояланган қурилма ўрнига ўзининг шахсий смартфонидан фойдаланмоқда. У эски iPhoneъидан нафақат яқинлари билан, балки амалдорлар, журналистлар, бизнес вакиллари ва ҳатто хорижий етакчилар билан иш юзасидан мулоқот қилиш учун ҳам фойдаланади.

The Atlantic маълумотига кўра, президент смартфонида у йиллар давомида ишлатиб келган телефон рақами сақланиб қолган. Бу рақамни ўнлаб, балки юзлаб одамлар билади. Энг ёмони, Трамп нотаниш рақамлардан келаётган қўнғироқларга ҳам жавоб беради.

АҚШ президентининг аноним маслаҳатчиларидан бири Трампнинг шундай қўнғироқлардан бирига қандай муносабат билдирганини сўзлаб берди:

Мен кетишим керак, менга бошқа мамлакатдан кимдир қўнғироқ қилмоқда, деб айтган Трамп телефон жиринглаганда.

У қўнғироқ қайси мамлакатдан эканлигини билмайди, фақат рақамни кўриб, “Эҳтимол, бу мен билан гаплашмоқчи бўлган хорижий етакчидир”, деб ўйлайди, дейди аноним манба.

Хитойлик хакерлар унинг телефонини аллақачон тинглаётгани ҳақида маълумотлар борлигига қарамай, АҚШ президенти бу борада унчалик ташвишланмаслиги таъкидланган.

Бу, айниқса, сўнгги йилларда Хитойнинг телефон тармоқларига кириб бориши ҳақида билганларимизни ҳисобга олсак, шубҳасиз, улкан хавфдир, дейди Барак Обаманинг собиқ миллий хавфсизлик бўйича маслаҳатчиси ўринбосари Бен Роудс.

Бироқ хавфсизлик соҳасидаги мутахассислар таъкидлашича, асосий хавф хитойлик хакерларда эмас, балки АҚШ президентига фирибгарлар ёки ҳазилкашлар (пранкерлар) бевосита қўнғироқ қилиб, гаплаша олиши мумкинлигидадир. Бундай ҳолатлар дунё сиёсатчилари билан вақти-вақти билан содир бўлиб туради.

АҚШ контрразведкаси собиқ раҳбари Жоэл Бреннер хавфсизлик протоколлари бежиз яратилмаганини билдирган. Унинг фикрича, Трамп исталган вақтда хорижий етакчи билан тегишли тайёргарликсиз ёки хабардор ходимлар иштирокисиз суҳбатлашиши, ҳаттоки бу суҳбатда мутахассислар билан маслаҳатлашмай муҳим келишувлар ёки имтиёзлар беришга рози бўлиши катта хавфдир.

The Atlantic ёзишича, Трампнинг жамоаси уни шахсий телефондан фойдаланишни тўхтатишга ишонтиришга ҳаракат қилган, аммо у хавф даражасини тушунмаяпти ёки уни эътиборсиз қолдирмоқда.