АҚШ президенти Дональд Трампнинг Украина бўйича махсус вакили Кит Келлогнинг айтишича, давлат раҳбари можарога барҳам бериш учун ҳам русларга, ҳам украиналикларга босим ўтказиш ниятида. Унинг фикрича, бир неча ой ичида сулҳга эришиш мумкин.
“Агар биз бу урушни тўхтата олсак, бу бутун дунёга, жумладан, Қўшма Штатларга ҳам фойда келтиради. Ўт очишни тўхтатиш ва доимий тинчликка эришиш бир неча ой ичида рўй бериши мумкин”, деди Келлог Fox News телеканалига берган интервьюсида.
Журналистлар махсус вакилдан Дональд Трамп маъмурияти Россияга қарши янги санкциялар жорий қиладими, деб сўради. Келлог бу мавзу бўйича жавоб беришга ваколати йўқлигини айтди.
Аввалроқ Дональд Трамп журналистларга АҚШ аллақачон Россия ҳамда Украина билан можарога барҳам бериш масаласини муҳокама қилаётганини айтганди. У яқин орада Россия президенти Владимир Путин билан жиддий масалада гаплашиб олмоқчилигини ҳам маълум қилган.
Дональд Трамп Украина бўйича вакили Кит Келлогга урушни 100 кунда тугатишни топширгани хабар қилинганди.
Келлогнинг ўзи ҳам Трампнинг инаугурациясидан олдинроқ Fox News телеканали эфирида Украинадаги ҳарбий можарони 100 кун ичида ҳал қилиш учун ечим топишни хоҳлашини айтганди. Бироқ ўша пайтлардаёқ экспертлар бундай интилишни нореал деб аташган.
Изоҳ (0)