Европа Конференциялар Лигаси саралаш босқичи доирасидаги баҳсда Туркиянинг “Башакшеҳир” клуби Норвегиянинг “Викинг” жамоасига қарши майдонга тушиб, 1:1 ҳисобида дуранг ўйнади.
Учрашувдаги ҳисоб 34-дақиқада очилди. “Башакшеҳир” ҳимоячиси Онур Булут автогол муаллифига айланди ва “Викинг” ҳисобда олдинга чиқиб олди. Бироқ орадан 6 дақиқа ўтиб, Элдор Шомуродовнинг аниқ узатмасидан сўнг Деви Зельке жавоб голини киритди — 1:1. Ўйиннинг қолган дақиқалари ҳам кескин курашлар остида ўтди, бироқ ҳисоб бошқа ўзгармади.
Ўйинни асосий таркибда бошлаган Элдор Шомуродов 83-дақиқада захирага олинди. “Башакшеҳир” сафида ҳаракат қиладиган яна бир ўзбекистонлик футболчи Аббосбек Файзуллаев эса қайдномага киритилмаган.
Икки ўйин натижасига кўра 4:2 ҳисобида ғалаба қозонган “Башакшеҳир” саралашнинг сўнгги босқичига йўл олди (дастлабки ўйин — 3:1).
Истанбул клуби навбатдаги босқичда Словакиянинг “Спартак Трнава” ва Руминиянинг “Университатя” жамоалари ўртасидаги баҳс ғолиби билан куч синашади.
Европа Конференциялар Лигаси
Саралаш учрашуви
13 август, чоршанба
“Башакшеҳир” — “Викинг” 1:1 (дастлабки ўйин — 3:1)
Голлар: 0:1 — Булут (34, автогол), 1:1 — Зелки (40)
Изоҳ (0)