AQSH prezidenti Donald Tramp rossiyalik hamkasbi Vladimir Putin bilan 4-iyun kuni telefon orqali muloqot qildi. Suhbatda tomonlar Ukrainaning “O‘rgimchak to‘ri” nomi ostida Rossiya harbiy aerodromlariga qilgan operatsiyasini ham muhokama qildi.
Suhbat davomida Putin Ukrainada yaqin orada tinchlik bo‘lishini kutmaslik kerakligini bildirgan. Shuningdek, u Moskva aerodromlariga uyushtirilgan hujumga javob qaytarilishini ta’kidlagan.
Men hozirgina Rossiya prezidenti Vladimir Putin bilan telefon orqali suhbatni yakunladim. Suhbat, taxminan, bir soat-u 15 daqiqa davom etdi. Biz Ukrainaning Rossiya samolyotlariga hujumini, shuningdek, har ikki tomondan sodir bo‘layotgan boshqa turli hujumlarni muhokama qildik.
Bu yaxshi suhbat bo‘ldi, lekin darhol tinchlikka olib keladigan suhbat emas. Prezident Putin yaqinda aerodromlarga qilingan hujumga javob qaytarishi kerakligini juda qat’iyat bilan aytdi, dedi AQSH rahbari.
Ukraina mavzusidan tashqari, Eron masalasi ham muhokama qilingan. Trampning so‘zlariga ko‘ra, u Putinga Tehron yadro quroliga ega bo‘lmasligi kerakligini aytgan.
Biz Eron haqida ham, Eronning yadro qurol bo‘yicha qaror qabul qilish muddati tugayotgani va bu qaror tezda qabul qilinishi kerakligi haqida ham gaplashdik! Men prezident Putinga Eronda yadro quroli bo‘lishi mumkin emasligini aytdim va bu borada, o‘ylaymanki, biz hamfikr edik. Putin Eron bilan muzokaralarda ishtirok etishi va ularni tezroq yakunlashda foydali bo‘lishi mumkinligini taxmin qildi, degan Tramp.
“O‘rgimchak to‘ri” operatsiyasi
Ukraina Xavfsizlik xizmati 1-iyun kuni Rossiyaning beshta aviatsiya bazalariga qarshi keng ko‘lamli maxsus operatsiya o‘tkazdi. Uning maqsadi Rossiya strategik aviatsiyasini, xususan, Ukraina shaharlariga muntazam ravishda hujum qilgan qanotli raketa tashuvchilarini ishdan chiqarish edi.
Operatsiya bir yarim yildan ko‘proq vaqt davomida tayyorlangan va puxta rejalashtirilgan. Hujumlar Rossiyada to‘xtab turgan yuk mashinalaridan uchib chiqqan dronlar yordamida amalga oshirilgan. Bu esa Ukraina chegarasidan uzoq masofada zarbalar berishga imkon bergan.
AQSH razvedkasi ma’lumotlariga ko‘ra, yetkazilgan zarar “sezilarli” bo‘lgan, biroq uning ko‘lami hali baholanmoqda Oq uydagi manbalar hujumlar natijasida Rossiya kamida oltita uzoq masofali Tu-95, kamida to‘rtta Tu-22M bombardimonchi samolyotlarini, shuningdek, har biri 300 million dollar qiymatidagi bir nechta A-50 radiolokatsion nazorat samolyotlarini yo‘qotganini ma’lum qilgan.
G‘arb ekspertlari fikricha, bu operatsiya urushda burilish nuqtasi bo‘lishi mumkin va Ukrainaning Rossiyaning strategik obyektlariga zarba berish qobiliyatini namoyish etadi. Operatsiyaga 117 ta dron jalb qilingan. Ular Rossiyaning strategik qanotli raketa tashuvchilarining 34 foizini yo‘q qilgan.
Zelenskiy operatsiyaning “ofisi” Rossiya viloyatlaridan birida Federal xavfsizlik xizmati boshqarmasi yonida joylashganini aytgan. Ukraina prezidenti “noyob operatsiya” uchun xavfsizlik xizmati xodimlariga minnatdorlik bildirgan.
Izoh (0)