Саудия Арабистонида АҚШ билан ўтказилаётган музокараларда Россия делегацияси Украинанинг тўрт вилояти — Донецк, Луганск, Запорожье ва Херсон ҳудудларининг барчасини ўз назоратига олишга интилмоқда. Бу ҳақда манбаларга таяниб, The Moscow Times хабар берди.
Гарчи бу ҳудудларнинг бирортаси ҳам Россия армияси томонидан тўлиқ назорат қилинмаётган бўлса-да, Кремль уларни маъмурий чегаралари бўйича — Россия конституциясида мустаҳкамланган аннексияга мувофиқ қўлга киритишни режалаштирмоқда.
Кремлга яқин амалдор президент Владимир Путин сиёсий жиҳатдан бу ҳудудларни йўқотишга йўл қўя олмаслигини айтди. У Россия ҳар қандай йўл билан улар устидан назоратни ўрнатишга интилаётганини таъкидлади.
Конституцияда ҳудудларнинг Россия таркибидан чиқиш механизми йўқ. Бизга Запорожье ва Херсон вилоятининг бутун ҳудуди керак, деди у.
Россиялик бошқа бир амалдор эса АҚШ Украинага Россия томонидан босиб олинган ҳудудлардан қўшинларни бутунлай олиб чиқиш талабини қўйиб, босим ўтказишига умид қилмоқда.
Ёки Трамп қўшинларини олиб чиқиш учун таъсир ўтказади, ёки бизга “Узоқ муддатли музокараларга киришинг, параллел равишда ҳарбий кучдан фойдаланиб, назоратни ўрнатинг” дейди. Бу биз учун энг ёмон вариант, чунки дарёларни ўзгартириш — доимий оғриқли жараён, дея тушунтирди амалдор.
Муқобил вариант сифатида Россия Украинанинг бошқа вилоятининг бир қисмини, масалан, Днепропетровск ёки Суми вилоятини эгаллаб олишга ҳаракат қилиши, кейин эса Херсон ва Запорожьега алмашишни таклиф қилиши мумкин.
Биз Днепрни кечиб ўтиш ва Херсонга ҳужум қилиш керак бўлмайдиган вариантни топишга умид қиламиз. Бунгача етиб бормаслигимиз керак. Бу биз учун минглаб йўқотишларни англатади, дейди яна бир суҳбатдош.
Февраль ойи ҳолатига кўра, Россия армияси Луганск вилоятининг 98,6 фоизини, Донецк вилоятининг 62,6 фоизини, Запорожье вилоятининг 71,9 фоизини ва Херсон вилоятининг 69,3 фоизини назорат остида ушлаб турди. Бундан ташқари, сўнгги икки вилоятда ҳарбийлар марказларни назорат қилмаяпти.
Бу ҳудудларни ҳарбий йўл билан эгаллашга Россия тезда қодир эмас. Россияликлар учун ҳатто бир нечта қишлоқни босиб олишнинг ўзи катта ютуқ. Днепрни кечиб ўтиб, Херсонни олиш ёки ҳатто икки қирғоқда жойлашган Запорожье шаҳрини эгаллаш учун фавқулодда ҳодиса юз бериши керак. Бу ўта қийин вазифа. Ёки Россия армияси кескин кучайтирилиши керак, бу тўсатдан ёки йўқ жойдан содир бўлмайди, ёки Украина мудофааси бутунлай қулаши лозим, дейди исроиллик ҳарбий эксперт Давид Шарп.
Москвадагилар Дональд Трампнинг маъмурияти учун Россияга қайси ҳудудлар ўтиши аҳамиятли эмаслигига умид қилмоқда.
Менимча, Трамп замонавий, яхши қуролланган, ғарбпараст Украинани кўришни хоҳлайди. У (Трамп) Украинани тўлиқ бермоқчи эмас. Аммо чегаранинг қаердан ўтказилиши унинг учун муҳим эмас, дейди россиялик дипломатлардан бири.
Изоҳ (0)