Украина президенти Владимир Зеленский 20 февраль куни Киевда АҚШ президентининг Украина ва Россия масалалари бўйича махсус вакили Кит Келлог билан учрашди. Бу ҳақда у ўзининг Telegram каналида хабар берди.
Учрашувдан сўнг таклиф этилган журналистлар сиёсатчиларнинг матбуотга мурожаат қилишини кутишган, бироқ бу содир бўлмади.
Америка томонининг илтимосига кўра, тадбир формати фақат протокол суратга олишдан иборат. Баёнотлар, саволлар ва жавоблар режалаштирилмаган, деди Зеленскийнинг матбуот котиби Сергей Никифоров.
Зеленский учрашув ҳақида
Президентнинг айтишича, улар “кўплаб тафсилотларни ўз ичига олган яхши суҳбат” ўтказган. Томонлар жанг майдонидаги вазият, асирларни қайтариш ва хавфсизлик кафолатлари ҳақида батафсил фикр алмашган. Украина президенти Трамп билан “чиндан ҳам фойдали” келишув тузишга тайёрлигини маълум қилган.
Украина ушбу урушнинг дастлабки сониялариданоқ тинчликка интилмоқда ва биз тинчликни ишончли ҳамда узоқ муддатли қилишимиз мумкин ва шундай қилишимиз керак, токи Россия қайтиб уруш бошлай олмасин. Украина АҚШ президенти билан инвестициялар ва хавфсизлик бўйича кучли, ҳақиқатда фойдали келишувга тайёрдир. Биз натижаларга эришишнинг энг тез ва конструктив усулини таклиф қилдик. Бизнинг жамоамиз 24/7 ишлашга тайёр, дейди Зеленский.
Трамп махсус вакилининг Украинага ташрифи
Кит Келлог 19 февраль куни эрталаб уч кунлик ташриф билан Киевга келди. Шу куни у Украина Қуролли кучлари бош қўмондони генерал Александр Сирский, Украина махсус хизматлари раҳбарлари, шунингдек, Украина президенти офиси раҳбари Андрей Ермак томонидан қабул қилинди.
20 февраль куни Келлог билан Украина ташқи ишлар вазири Андрей Сибига учрашди. ТИВ раҳбарининг сўзларига кўра, учрашувда томонлар кенг қамровли, адолатли ва мустаҳкам тинчликка эришиш йўлларини муҳокама қилган.
“Мен Украинанинг куч билан тинчликка эришишга тайёрлигини ва зарур қадамларни кўришимизни тасдиқладим. Шунингдек, мен Украина ва трансатлантика хавфсизлиги бўлинмас эканлигини такрорладим”, деди у Х ижтимоий тармоғида.
Трамп Зеленскийни “сайловларсиз диктатор” деб атади
Сайловсиз диктатор. Зеленский тезроқ ҳаракат қилиши керак, акс ҳолда унинг мамлакати буткул тамом бўлади. Биз Россия билан урушни тугатиш бўйича музокараларни муваффақиятли олиб бормоқдамиз. Буни фақат Трамп ва унинг маъмурияти уддалай олишини барча эътироф этди, дейди АҚШ етакчиси.
У “Украинани яхши кўриши, бироқ Зеленский жуда ёмон иш қилгани сабабли унинг мамлакати вайрон бўлгани ва миллионлаб одамлар сабабсиз ҳалок бўлгани”ни қўшимча қилди.
Трампнинг таъкидлашича, Зеленский АҚШни “ҳеч қачон бошланмаслиги керак бўлган, ғалаба қозониб бўлмайдиган уруш учун” 350 миллиард доллар ажратишга кўндира олган. Украина президенти Вашингтон Киевга гўёки 500 миллиард долларлик ёрдам бергани ҳақидаги маълумотлар ҳақиқатга тўғри келмаслигини айтди.
Украина ТИВ муносабати
Ташқи ишлар вазири Андрей Сибига АҚШ президентининг таҳдидларига жавоба Украина Европа замонавий тарихидаги энг даҳшатли ҳарбий ҳужумга ва уч йиллик тўлиқ урушга бардош берганини айтди.
Украина халқи ва унинг президенти Владимир Зеленский Путиннинг босимига бўйсунишни рад этди. Ҳеч ким Украинани таслим бўлишга мажбурлай олмайди. Биз ўз мавжудлик ҳуқуқимизни ҳимоя қилишда давом этамиз, дея таъкидлади у.
Изоҳ (0)