Украина президенти Владимир Зеленский офиси маслаҳатчиси Михаил Подоляк Қрим кўпригидаги портлашга муносабат билдирди. Бу ҳақда у Twitter’даги саҳифасида маълум қилди.
“Россиянинг оммавий қотиллик қуролларини етказиб бериш учун фойдаланилган барча ноқонуний тузилмаларни вайрон қилиш сабабларидан қатъи назар, улар қисқа муддатли”, — деган Подоляк.
Украина хавфсизлик хизмати (УХХ) эса “Путин режимининг тимсолларидан бири яна қандай қилиб ҳарбий юкларга бардош бера олмаганини қизиқиш билан кузатаётгани”ни билдирди. УХХ захирасидаги генерал майор Виктор Ягун Қрим кўприги бутунлай вайрон бўлса ёки қисман бузилган бўлса, у ҳолда рус ҳарбийлари Украинанинг бир қатор босиб олинган ҳудудларини тарк этишини айтди.
У бундай сценарий асосида Херсон ва Запорожье вилоятларини тезда озод қилиш эҳтимоли сезиларли даражада ошиши, чунки Россия бу йўналишни захира ва ўқ-дориларни тўлдириш учун ишлатишини илгари сурди.
Қрим кўпригидаги портлаш
17 июлга ўтар кечаси Қрим кўпригида портлаш содир бўлди. Россия расмийларининг даъво қилишича, Украинанинг ерусти дронлари кўприкка ҳужум қилган, оқибатда икки киши ҳалок бўлган, 14 ёшли бола жароҳатланган.
Россия Тергов қўмитаси “Теракт” моддаси бўйича иш қўзғатган, Украина махсус хизматлари портлашни уюштирганликда гумон қилинмоқда. Украина ОАВ манбаларининг айтишича, бунинг ортида Украина Хавфсизлик хизмати ва Украина денгиз флоти турибди. УХХ портлаш ҳақида батафсил маълумотни “Украинанинг урушдаги ғалабасидан кейин” беришини айтган.
Россия президентининг матбуот котиби Дмитрий Песков Россиянинг барча тегишли хизматлари ва идоралари Қрим кўпригидаги портлашдан сўнг эҳтимолий янги ҳужумларга тайёр эканини айтган. У “махсус ҳарбий операция”нинг мақсадлари орасида Қрим кўпригидаги портлашга жавоб ҳам бўлишини билдирган.
Изоҳ (0)