Moskvadagi Ryazan prospektida 17-dekabr kuni portlash yuz berdi, oqibatda rus generali Igor Kirillov halok bo‘ldi. Bu haqda Meduza xabar berdi.
Rossiya Tergov qo‘mitasiga ko‘ra, voqea oqibatida ikki erkak halok bo‘lgan. Favqulodda xizmatlar portlash oqibatida turar-joy binosining birinchi va uchinchi qavatlaridagi derazalar singani, podyezdning kirish eshigi shikastlanganini aytmoqda.
Mash kanaliga ko‘ra, general yordamchisi bilan Ryazan prospektidagi uyidan ertalab soat 6 atrofida chiqqan. Shu payt qo‘lbola portlatish qurilmasi faollashgan. Hozirda holat yuzasidan tekshiruv olib borilmoqda.
Marhum urushda kimyoviy qurollardan foydalanishni buyurgan
Ukraina Xavfsizlik xizmati ta’kidlashicha, Igor Kirillovning buyrug‘i bilan 2022-yil fevral oyidan buyon Rossiya tomonidan 4800 dan ortiq kimyoviy qurollardan foydalanish holatlari qayd etilgan. Gap CS va CN kabi qo‘zg‘atuvchi ta’sirga ega zaharli moddalar bilan jihozlangan K-1 jangovar granatalari haqida bormoqda.
Ulardan foydalanish 1993-yildan beri Kimyoviy qurolni ishlab chiqish, ishlab chiqarish, qo‘llash va yo‘q qilishni taqiqlash to‘g‘risidagi konvensiya bilan man etilgan. Urush davomida 2000 dan ortiq harbiy turli darajadagi kimyoviy zaharlanish bilan kasalxonalarga tushgan.
Rossiya asosan FPV-dronlardan mudofaa nuqtalariga zaharli moddalar bilan o‘q-dorilar tashlashda foydalanadi. Bu esa shilliq qavatlarning, birinchi navbatda, ko‘z va nafas yo‘llarining shikastlanishiga olib keladi.
Rossiyada qanotli raketalar muhandisi o‘ldirib ketildi
Izoh (0)