Литвада НАТОнинг шарқий қанотини мустаҳкамлаш учун Германия қуролли кучлари бригадаси расман доимий асосда жойлаштирилди. Бу ҳақда Politico хабар берди.

Беш минг ҳарбийдан иборат тузилма 2027 йил охиригача тўлиқ жанговар тайёргарликка эга бўлиши режалаштирилган. Бу Иккинчи жаҳон урушидан бери илк бор немис ҳарбийларининг хорижда доимий жойлашуви саналади.
Бизда аниқ вазифа бор. НАТОнинг шарқий қанотида Литва иттифоқчиларининг ҳимояси, эркинлиги ва хавфсизлигини таъминлашимиз керак, деди Бундесвернинг Литвадаги 45-танк бригадаси қўмондони генерал Кристоф Хубер.
У бригаданинг Литвада жойлаштирилиши НАТО ҳудудини ва Германиянинг ўзини ҳимоя қилишни таъминлашини таъкидлади.
Литва тарихидаги энг йирик ҳарбий инфратузилма
Бригаданинг асосий жойлашув пункти Вильнюсдан 30 километр жанубда жойлашган, ҳали қурилмаган Руднинкайдаги ҳарбий мажмуа бўлади. Ўша пайтгача ҳарбийлар вақтинчалик базаларда жойлашади. Ҳозирда Литвада Германиянинг атиги 150 нафар ҳарбий хизматчиси бор.
2024 йил август ойида Литва Мудофаа вазирлиги Рудникайда “Литва тарихидаги энг йирик ҳарбий инфратузилма” қурилиши бошланаётганини эълон қилган. Ҳарбий шаҳарча майдони 170 гектарни ташкил этади.
Россия ва Беларусь билан чегарадош бўлган Литва Германиянинг ҳарбий иштирокини ўз миллий хавфсизлиги учун муҳим деб баҳолайди.
Германия мудофаа вазири Борис Писториус 2024 йил октябрь ойида Литва парламентида сўзлаган нутқида Германия қуролли кучлари Россиянинг Европадаги тажовузини тўхтатиб туришда асосий таянч бўлишга тайёрлигини айтганди. У Украинадаги уруш Россия учун фақат бошланиши эканини таъкидлаган.
Россия гибрид усуллар билан бизнинг бирдамлигимизни, Европа Иттифоқи ва НАТОни заифлаштиришга уринмоқда. Путиннинг ҳақиқий душмани — бизнинг эркин ва мустақил, демократик турмуш тарзимиздир, дея алоҳида таъкидлаган у.
Изоҳ (0)