Россия армияси қўмондонлиги 2022 йил кузида Украинага тактик ядровий зарба бериш имкониятини кўриб чиққан. Бу ҳақда АҚШ разведкасига таяниб, The New York Times хабар берди.
Харьков вилояти ва Херсондаги мағлубиятлардан сўнг, АҚШ разведкаси рус генералларининг махфий музокараларини қўлга киритишга муваффақ бўлган. Ядро қуролидан фойдаланиш ҳақида ўша пайтда Украинадаги Россия гуруҳи қўмондони, кейинчалик “Вагнер” исёнига алоқадорликда айбланиб ҳибсга олинган генерал Сергей Суровикин гапирган.
У Украина қўшинларининг Днепрдан кечиб ўтишига ва Қримга эҳтимолий ҳужумни бошламаслигига йўл қўймаслик учун шундай таклифни илгари сурган. Ушбу музокаралар фош бўлгач, АҚШ разведкаси Украина урушида ядровий кескинлашув эҳтимолини 5-10 фоиздан 50 фоизгача кескин оширган.
Бунга қадар Россия расмийлари Украинани “ифлос бомба” портлатиш режасида айблаган, Кремль амалдорлари эса бир неча бор ядровий таҳдидлар билан чиққан эди.
Financial Times маълумотларига кўра, АҚШ ядровий эскалациянинг олдини олиш учун Хитойни жалб қилган. Хитой раиси Си Цзиньпин шахсан россиялик ҳамкасби Владимир Путинни бу икки давлат ўртасидаги муносабатларга путур етказишидан огоҳлантирган. ФТ манбаларининг таъкидлашича, Си Цзиньпин тегишли мурожаатини Путинга 2023 йил март ойида Москвадаги шахсий учрашувда етказган.
2024 йилнинг май ойида Польша ташқи ишлар вазири Радослав Сикорский бундай сигнални Кремлга АҚШнинг ўзи ҳам етказганини айтди.
Америкаликлар агар ядровий қурол қўлласангиз, ҳеч ким ҳалок бўлмаса ҳам, Украинадаги барча объектларингизга оддий қурол билан зарба берамиз ва уларни йўқ қиламиз, дейишган, дея таъкидлаган Сикорский.
Америка олимлари федерацияси (ФАС) маълумотларига кўра, 12 мингдан ортиқ ядро каллаклари мавжуд. Уларнинг 90 фоизи Россия ва АҚШ ҳиссасига тўғри келади. 2024 йил август ҳолатига кўра, Россияда 5580 та, АҚШда эса 5044 та ядровий каллак бор. Бошқа давлатларнинг ядро каллаклари сони эса суратда акс этган.
Изоҳ (0)