Россия ҳужум қилган тақдирда Польша армияси мамлакатни икки ҳафтагача мудофаа қила олади. Польша Миллий хавфсизлик бюроси раҳбари Дариуш Луковский буни ўқ-дорилар етишмаслиги билан изоҳламоқда. Бу ҳақда Polsat News хабар берди.
Луковскийдан Польша армияси ихтиёридаги ўқ-дориларнинг ҳозирги ҳолати ҳақиқатан ҳам урушнинг беш кунига етиши мумкинми, деб сўралди.
У вазият кўплаб омилларга, хусусан, ўқ-дори турларига боғлиқлигини айтди. Бироқ, Калининград вилояти ёки Беларусь томонидан Россия ҳужум қилган тақдирда Польша НАТО иттифоқчиларининг ёрдами келгунга қадар икки ҳафта давомида ҳужумларни қайтариши мумкинлигини таъкидлади.
Менимча, бу кураш қандай олиб борилишига боғлиқ, бугунги захиралар билан бу ҳимоя бир-икки ҳафта давом этиши мумкин, деди полшалик генерал.
Луковский мамлакат бундай таҳдидни кейинга қолдириш босқичида экани, бироқ ҳарбий кучларини ошириб бораётганини айтди. У Украина туфайли Польша мустаҳкамланиб, уруш бўлган тақдирда Россияга қарши тура олишини қайд этди.
Умид қиламизки, Украинанинг қаршилик кўрсатиши эвазига қўлга киритилаётган икки-уч йил ичида биз ўз салоҳиятимизни шу қадар тиклаймизки, Россия агрессиясига реал қарши тура оламиз, дея тушунтирди Луковский.
Польша генерали Варшаванинг Украинага ёрдам бераётгани сабабли захираларининг бир қисмини сарфлаётганини таъкидлади. Бироқ бу жараён вазият ёмонлашмаслиги учун эҳтиёткорлик билан олиб борилаётганини айтди.
Польшада Россия билан уруш эҳтимолига “тревога рюкзаклари” сотилаётгани ҳақида хабар бергандик. Рюкзакларда уруш ёки бошқа фавқулодда вазиятларда зарур 15 та буюм мавжуд.
Жумладан, SOS режимига эга фонарча, ҳуштакли ётоқ халтаси, тактик пичоқ, монтировка, қаламли блокнот, плаш, омбур, учтаси бирда USB-кабел, универсал сумка, пўлат кружка ва илгакли эластик шнур шулар жумласидандир. “Тревога рюкзаги” тахминан 150 злота (салкам 504 минг сўм) туради.
Изоҳ (0)