“Дарё” нашри 30 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади
Эронга нисбатан давомли зарбаларни қайси давлат ёлламоқда?
Сурияда 25 та юк машинасидан иборат карвон авиазарбага учради. Аl-Arabia телеканалининг хабар беришича, юк машиналари Эрондан келаётган бўлган, улар Эрон Ислом инқилоби посбонлари корпуси томонидан қўллаб-қувватланадиган гуруҳларга қурол-яроғ олиб кетаётгани тахмин қилинган.
Журналистлардаги маълумотларга кўра, дронлар зарбаси Суриянинг Ал-Букамале шаҳридаги туман яқинида “Ҳизбуллоҳ” назорат қиладиган норасмий чегара пунктига берилган ва у олтита юк машинасини вайрон қилган.
Ҳозирча ҳеч ким ҳужум учун жавобгарликни ўз зиммасига олмади. Суриялик инсон ҳуқуқлари фаоллари: учувчисиз учар аппаратлар АҚШ бошчилигидаги халқаро коалицияга тегишли бўлиши мумкинлигини таъкидламоқда.
Эслатиб ўтамиз, 29 январь куни Эрондаги стратегик объектларда қатор портлашлар содир бўлганди. ОАВ хабарларига кўра, ҳужум ортида Исроил ва АҚШ турган бўлиши мумкин.
Мазкур вазиятда Пентагон матбуот котиби Патрик Райдер: Эрондаги объектларга берилган зарбаларда АҚШ ҳарбийларининг ҳеч қандай алоқаси йўқлигини маълум қилди.
Reuters’га агентлигининг исми ошкор этилмаган расмийларга таяниб ёзишича, АҚШ бўлиб ўтган воқеада Исроилни айбламоқда.
Россия Болтиқбўйи мамлакатлари ва ёки Польшага қарши ҳужум бошлаган тақдирда НАТО билан юзма-юз келади
Украина ташқи разведкасининг собиқ раҳбари, армия генерали Николай Маломужга таяниб, UNIAN хабар беришича: Украинада Россия ва НАТО ўртасидаги эҳтимолий тўғридан-тўғри тўқнашув сценарийси ишлаб чиқилмаяпти.
“Агар жуда самарали операсия тайёрланганда, уруш тезда тугаши мумкин эди,- генералнинг таъкидлашича Россия НАТО бирлашган кучлари салоҳиятининг ўндан бир қисмига ҳам эга эмас.
Унинг фикрича, агар НАТО урушга киришса, Россия ядровий стратегик ҳужум қуролларини жойлаштиришга ҳаракат қиларди. Дунё эса глобал инқироз ва бутун инсониятни йўқ қилиш хавфи ёқасида бўларди.
“Байден ва бошқа дунё етакчилари бу чизиқни жуда аниқ ҳис қилмоқда. Шунинг учун глобал ҳужум бўлмайди ва ҳозирда бундай сценарий ишлаб чиқилмаяпти.
Агар Россия НАТО давлатларидан бирига — Болтиқбўйи мамлакатлари, Польшага қарши ҳужум бошлаган тақдирда НАТОнинг армияси Россия билан юзма-юз келади. Бу жараёнда НАТО Украинани қўллаб-қувватлаш учун эмас, балки Россия агрессиясига жавобан урушга киради”, — дейди генерал.
Украина баҳорда Ғарб танкларидан фойдалана бошлайди,2023 йил охирида эса Abrams М1А2 танклари етказилиши режада
Украина Қуролли кучлари Ғарб берадиган танклардан баҳордаёқ фойдаланишни бошлаши мумкин, деди мамлакат мудофаа вазири Алексий Резников CBC телеканалига берган интервьюсида.
Вазирнинг сўзларига кўра: Ғарб ваъда қилган танклар билан Украина Қуролли кучларида камида иккита танк баталёнлари ташкил этилади ва улардан қарши ҳужумни давом эттириш учун фойдаланилади.
Мудофаа вазири Ғарб давлатлари Украинага танк етказиб беришда давом этишига ишонч билдирди.
Кейинроқ The Washington Post нашри Жо Байден ваъда қилган 31 та Abrams М1А2 танклари Украинага 2023 йилнинг охирида етказиб берилиши мумкинлиги ҳақида хабар берди. Нашр мақоласида айтилишича, танклар АҚШ ҳарбий захираларидан олиб берилмайди, балки Украина хавфсизлигини таъминлаш ташаббуси доирасида сотиб олинади.
Нукусдаги кўп қаватли уйда газ портлади ва қутқарув жараёнида қурбонлар сони кўпайди, ҳолат юзасидан жиноят иши қўзғатилди
Нукусдаги кўп қаватли уйда 29 январь куни газ портлаши оқибатида беш киши ҳалок бўлганди. Қорақалпоғистон прокуратураси ҳолат юзасидан жиноят иши қўзғатилганини маълум қилди.
Шаҳарнинг “Темир жол” маҳалласида жойлашган 4 қаватли уйда газ-ҳаво аралашмасининг чақнаши туфайли портлаш содир бўлиб, уйдаги бир нечта хонадонларнинг том ва пол қисмлари ўпирилиб, 4-қаватдан 1-қаватгача тушиб кетган.
30 январь куни соат 02:30 ларда ФВВ қутқарувчилари томонидан турли даражадаги жароҳатлар билан вайроналар остида қолиб кетган 5 ёшли қизалоқ чиқариб олинган ва тиббий ёрдам кўрсатиш учун шифохонага юборилган. Орадан 30 дақиқа ўтиб бино конструксиялари орасидан бир нафар фуқаронинг жасади топилган.
Эрта тонгга келиб, вайроналар остидан яна тўрт нафар фуқаронинг жасади топилиб, жами ҳалок бўлганлар 5 нафарга етди.
Мазкур ҳолат юзасидан Жиноят кодексининг 259-моддаси 2-қисми “б” банди билан жиноят иши қўзғатилиб, тергов ҳаракатлари олиб борилмоқда. Ҳозирда айбдор шахслар доирасини аниқлаш, уларни жиноий жавобгарликка тортиш масаласи ҳал этилмоқда.
Изоҳ (0)