Украина Қуролли кучларининг собиқ бош қўмондони Валерий Залужний 2022 йилда Белгород йўналишида ҳужум қилиш режасини таклиф этган. Бу ҳақда Залужнийнинг маслаҳатчиси бўлган генерал майор Виктор Назаров маълум қилди.
Назаровнинг айтишича, 2022 йил декабрь ойида Украина Миллий хавфсизлик ва мудофаа кенгаши аппаратидаги йиғилишлардан бирида Залужний маъруза қилган. Унда Россия билан уруш стратегиясига оид бир нечта таклиф мавжуд эди. Улардан бири “ҳарбий ҳаракатларни душман ҳудудига кўчириш”ни назарда тутган.
“Ўша пайтда биз таклиф этган вариантда Белгород вилояти ҳақида гап борарди. Душманга жиддий таҳдид солиш учун айнан шундай ҳаракат йўналишлари таклиф қилинганди. Мен эса янада қатъийроқ мақсадларни илгари сурдим”, деди Назаров.
Белгороднинг ўзини эгаллаш режалаштирилганми, деган саволга жавобан, Назаров рус армиясини Харьковга зарба бериш имкониятидан маҳрум қилиш, Донбассдаги гуруҳнинг таъминотини хавф остига қўйиш учун қамал қилиш ёки қуршовга олиш ҳақида гап кетаётганини тушунтирди.
Унинг сўзларига кўра, таклифлар билдирилган ва уларни аниқлаштириш учун “сиёсий қарор етарли эди”. Аммо Залужний шундан сўнг истеъфога чиқарилгани сабабли, Назаров бу ғоялар ҳеч кимни қизиқтирмагандек қолганини айтди.
Залужний истеъфоси
Владимир Зеленский 2024 йил 8 февралда Валерий Залужнийни Украина Қуролли кучлари бош қўмондони лавозимидан озод этди. Унинг ўрнига Қуруқлик қўшинлари қўмондони генерал-полковник Александр Сирский тайинланди.
2024 йил 6 августда Украина армияси Курск вилоятида ҳужумга ўтиб, босиб олинган Сужа шаҳригача етиб борди. Сужада Украина ҳарбий комендатураси ташкил этилди, тинч аҳолининг бир қисми шаҳарда қолмоқда. Зеленскийнинг ўзи Украина Қуролли кучларининг Курск вилоятидаги позициясини Россия ва Украина ўртасида тинчликка эришиш бўйича барча эҳтимолий музокараларда “кучли козир” деб таърифлади.
Изоҳ (0)