Россиялик генерал-лейтенант Игор Кирилловни ўлдирганликда гумонланиб ҳибсга олинган Ўзбекистон фуқароси Аҳмаджон Қурбоновга нисбатан қандай айблов қўйилгани маълум бўлди. Бу ҳақда ҳуқуқ-тартибот органларига таяниб, “ТАСС” хабар берди.
Маълумотга кўра, Қурбонов Россия Жиноят кодексининг бир вақтнинг ўзида учта моддаси бўйича айбланмоқда: 105-модда (қасддан одам ўлдириш), 205-модда (террористик ҳаракат) ва 222-модда (қуролни қонунга хилоф равишда қўлга киритиш, бериш, сотиш, сақлаш, ташиш, жўнатиш ёки олиб юриш).
Қурбонов ўта оғир жиноят содир этганликда айбланмоқда, бу умрбод озодликдан маҳрум қилишга олиб келиши мумкин. Москванинг Басманний суди 19 декабрь куни Қурбоновни 2025 йил 17 февралгача қамоқда сақлаш тўғрисида қарор чиқарди.
Ҳибсга олиш тўғрисида қарор қабул қилишда Ўзбекистон фуқаросининг илгари судланмагани, оилали экани, қарамоғида икки нафар ёш бола ва уч нафар вояга етмаган фарзанди борлиги, шунингдек, у ўта оғир жиноятларда айбланаётгани инобатга олинган.
Басманний судида айбланувчи терговчининг илтимосномасини ҳал қилишни судьянинг ихтиёрига қолдирган. Унинг ҳимоячиси эса қамоққа олишга қарши чиқиб, Қурбонов учун қамоққа олиш билан боғлиқ бўлмаган эҳтиёт чорасини қўллашни сўраган.
Россия хавфсизлик хизмати: Кирилловни ўлдирган шахсга 100 минг доллар ваъда қилинган
Россия Тергов қўмитаси 18 декабрь куни Кириллов ва унинг ёрдамчиси Илья Поликарповни ўлдиришда гумонланаётган шахс қўлга олингани ҳақида маълум қилди. 1995 йилда туғилган Ўзбекистон фуқароси қамоққа олинган. Россиялик ҳуқуқ-тартибот идоралари ходимларига кўра, сўроқ пайтида у гўёки “Украина махсус хизматлари томонидан ёллангани”ни тан олган ва жиноятни содир этгани учун унга “100 минг доллар миқдорида пул мукофоти ҳамда Европа Иттифоқига чиқиш” ваъда қилингани айтилган.
Генерал Игор Кирилловни ўлдириш
Кириллов ва Поликарповнинг портлатиб юбориш 17 декабрь куни содир бўлган. Улар Москванинг Рязань проспектидаги подъезддан чиқаётганда соат 06:00 атрофида портлаш оқибатида ҳалок бўлган.
Терговчилар портлатиш мосламаси подъезд ёнида турган самокатга жойлаштирилганини айтган. Кирилловни олиб кетиш учун келган машина ҳайдовчиси тирик қолган.
The Wall Street Journal, Reuters ва “Укринформ” ўз манбаларига таяниб, портлашда Украина махсус хизматларининг иштироки ҳақида ёзишган. Украина хавфсизлик хизматидаги манбанинг BBCга маълум қилишича, Кириллов “махсус операция” натижасида “ҳарбий жиноятчи” сифатида йўқ қилинган. Шу билан бирга, Украина президенти офиси раҳбари маслаҳатчиси Михаил Подоляк Киев террорчилик усулларидан фойдаланмаслигини айтган.
Марҳум урушда кимёвий қуроллардан фойдаланишни буюрган
Украина Хавфсизлик хизмати таъкидлашича, Игор Кирилловнинг буйруғи билан 2022 йил февраль ойидан буён Россия томонидан 4800 дан ортиқ кимёвий қуроллардан фойдаланиш ҳолатлари қайд этилган. Гап CС ва CН каби қўзғатувчи таъсирга эга заҳарли моддалар билан жиҳозланган К-1 жанговар гранаталари ҳақида бормоқда.
Улардан фойдаланиш 1993 йилдан бери Кимёвий қуролни ишлаб чиқиш, ишлаб чиқариш, қўллаш ва йўқ қилишни тақиқлаш тўғрисидаги конвенция билан ман этилган. Уруш давомида 2000 дан ортиқ ҳарбий турли даражадаги кимёвий заҳарланиш билан касалхоналарга тушган.
Изоҳ (0)