26 декабрга ўтар кечаси Украина Қуролли кучлари Феодосия портига ҳужум қилди, деди аннексия қилинган Қрим раҳбари Сергей Аксенов.
“Феодосия туманида душман ҳужуми амалга оширилди. Порт ҳудуди ўраб олинган. Айни пайтда портлаш тўхтатилган ва ёнғин ўраб олинган. Зонада барча тегишли хизматлар ишламоқда. Бир неча уйнинг аҳолиси кўчирилади. Вазиятни шахсан назорат қиляпман. Сиздан хотиржам бўлишингизни ва фақат расмий маълумотларга ишонишингизни сўрайман”, — деб ёзди у кечаси Telegram’даги каналида.
Кейинроқ Аксенов Феодосиядаги ҳужумда бир киши ҳалок бўлгани, яна икки киши яралангани ҳақида хабар берди. Олтита бино шикастланган.
Ижтимоий тармоқларда воқеа гувоҳларининг портлаш акс этган видеолари пайдо бўлди.
Украина Қуролли кучлари Ҳарбий ҳаво кучлари қўмондонлиги Украина тактик авиацияси Феодосия туманида Россия Қора денгиз флотининг “Новочеркасск” йирик десант кемасини портлатиб юборганини маълум қилди. Ҳарбий маълумотларга кўра, қанотли ракета ҳужуми маҳаллий вақт билан 02:30 атрофида амалга оширилган. Тахминларга кўра, кема Россия томонидан Украинага ҳужум қилишда фойдаланилган Shahed ҳужумчи дронларини Эрондан Қримга етказган.
“Россиядаги флот кичрайиб бормоқда! Россия Қора денгиз флотининг флагмани бўлган “Москва” крейсери ортидан бу сафар “Новочеркасск” йирик десант кемаси бормоқда. Ҳарбий ҳаво кучлари учувчилари ва операцияда иштирок этган барчага пухта меҳнати учун миннатдорлик билдираман”, — деб ёзди Украина Қуролли кучлари Ҳарбий-ҳаво кучлари қўмондони, генерал-лейтенант Николай Олешук Telegram’да.
Россия Мудофаа вазирлиги Феодосиядаги “Новочеркасск” кемасига зарар етказилгани ҳақидаги маълумотни тасдиқлади. Вазирлик маълумотларига кўра, Украина Қуролли кучлари кемага авиацион бошқариладиган ракеталар билан ҳужум қилган. Мудофаа вазирлигининг қўшимча қилишича, зенит жанги пайтида ҳаво ҳужумидан мудофаа тизимлари Украинанинг иккита Su-24 самолётини йўқ қилган.
-SdczsORp.jpg)
Феодосияга ҳужумдан ташқари, Украина ҳарбий-ҳаво кучлари 26 декабрга ўтар кечаси Россия ҳарбийлари томонидан учирилган 19 та дрондан 13 тасини йўқ қилгани ҳақида хабар берди. Одесса, Херсон, Николаев ва Хмельницкий вилоятларида ҳужумчи дронлар уриб туширилди.
2022 йил март ойида Украина Қуролли кучлари босиб олинган Бердянск портига ҳаво ҳужуми уюштирганди. Ўшанда украиналик ҳарбийлар Россия Қора денгиз флотининг йирик “Саратов” десант кемасини йўқ қилганини, шунингдек, “Сезар Куников” ва “Новочеркасск” десант кемаларига зарар етказганини эълон қилди.
Украина Қуролли кучларининг Россия Қора денгиз флоти жойлашган Севастополга бир қатор ҳужумларидан сўнг флот кемаларининг бир қисми Феодосия портига ўтказилди.
Изоҳ (0)