Россия ҳукумати Хитойга етказиб берилаётган газ нархини яна пасайтиришни режалаштирмоқда. Бу ҳақда мамлакатнинг Иқтисодий ривожланиш вазирлиги тайёрлаган ривожланиш прогнозига таяниб, The Moscow Times хабар берди.
Хитой 2024 йил “Сибир кучи” қувури орқали етказиб берилган минг кубометр газ учун 267,6 доллар тўлаган. Бу Европа ва Туркия мижозлари тўлаган нархдан (376,9 доллар) 30 фоизга арзонроқ эди.
2025 йилда эса Хитой учун нарх 247,3 долларгача пасаяди, Европа ва Туркия учун эса аксинча, минг кубометр учун 403 долларгача ошади. Шу тариқа Хитой учун чегирма 39 фоизгача етади ва минг куб метр учун 150 доллардан ошади.
Иқтисодий ривожланиш вазирлиги прогнозига кўра, газ экспорт нархининг пасайиши ва нефть нархларининг кескин тушиши Россия иқтисодиётининг валюта тушумларига салбий таъсир кўрсатади: бу йили углеводородлар экспортидан кутилган 236 миллиард доллар ўрнига 200 миллиард доллар даромад олинади. 2026 йилда эса валюта тушуми дастлабки прогноздан 9 миллиард долларга кам бўлади.
“Газпром” 2024 йил Хитойга 31 миллиард кубометр газ экспорт қилган, бу йил эса “Сибир кучи” қувури орқали 38 миллиард кубометр етказиб беради. Бироқ бу кўрсаткич урушгача Европа Иттифоқига экспорт қилинадиган газ ҳажмининг 20 фоизидан камини ташкил этади; ўшанда экспорт ҳажми энг юқори даражада 200 миллиард кубометрга чиққан эди.
Бир вақтлар капиталлашуви 1 триллион долларга етишни кўзлаган “Газпром” қудратли давлат корпорацияси 2023 йилда тарихдаги энг катта зарарни кўрди. Жумладан, бир триллион рублдан ортиқ маблағни бой берди.
Изоҳ (0)