Қозоғистон Россия газини Ўзбекистонга ташишни октябр ойининг охирида бошлайди. Бу ҳақда республика энергетика вазири Алмасадам Саткалиев брифингда маълум қилди, деб ёзмоқда “Власт.кз”. Ушбу маълумот Россиянинг “ТАСС” ва бошқа ахборот агентликларида ҳам чоп этилди.
Аввал Қозоғистон Россиядан Ўзбекистонга газ транзитини 1-октябрдан бошлашни режалаштирганди. Саткалиев таъкидлашича, ҳозирда газ қувурида таъмирлаш ишлари давом этмоқда, Қозоғистонга транзит бўйича ҳали зарур ариза келиб тушмаган.
“Ҳозирда Қозоғистон Республикаси ҳудудида қурилиш билан боғлиқ ишлар якунланмоқда, газни ҳисобга киритиш учун алоҳида линия ажратилмоқда. Жадвалга кўра, октябр ойи охиригача ишлар якунланиши керак”, — деди Саткалиев.
Унинг қўшимча қилишича, транзит қилинадиган газ ҳажми бўйича ҳали якуний келишувга эришилмаган.
“Дарё” Россия газини Қозоғистон орқали Ўзбекистонга ташиш октябрда бошланиши ҳақидаги маълумотга изоҳ сўраб, Ўзбекистон Энергетика вазирлигига мурожаат қилди. Вазирлик матбуот котиби бу борада ҳали расмий қарор йўқлигини билдирди.
“Ўзбекистон томони газни бугун юборишса, бугун қабул қилишга тайёр. Аммо бу жиддий масала. Транзит масаласи. Фақат бизгагина боғлиқ бўлмаган ҳолат”, — деди Энергетика вазирлиги матбуот котиби Ҳасан Тошхўжаев.
Июнь ойида “Газпром” “ҚазақГаз” билан газни Ўзбекистонга ташиш бўйича шартнома имзоланганини эълон қилди. Россия компанияси ҳам, Қозоғистон Энергетика вазирлиги ҳам келишув шартларини ошкор қилмади.
Изоҳ (0)