Россиянинг “Азимут” авиакомпаниясининг Сочидан парвоз қилаётган Sukhoi Superjet 100 самолёти Туркиянинг Анталия аэропортига қўнганидан сўнг ёниб кетди. Бу ҳақда Росавиация матбуот котиби Артем Кореняко хабар берди.
Ҳодиса 24 ноябрь куни содир бўлган. “Росавиация” расмийси ёнғин оқибатида самолёт йўловчилари жароҳат олмаганини айтган. Лайнер командири йўловчиларни шишириладиган траплар орқали эвакуация қилишга кўрсатма берган.
Жабрланганлар йўқлиги ҳақидаги маълумотни авиакомпания ҳам тасдиқлаган. Туркия Транспорт вазирлиги маълумотларига кўра, самолётда 95 киши бўлган. Анталия аэропорти эса самолётда 91 киши бўлганини хабар қилмоқда.
Кореняконинг айтишича, ёнғинини Туркия аэропортининг фавқулодда-қутқарув гуруҳи тезда ўчиришга эришган. Гувоҳлар аввалига самолётнинг двигатели ёнгани, шундан сўнг аланга бошқа жойга ўтганини айтмоқда. Ҳозирда ёнғин ўчирилган.
Июль ойида Superjet 100 Москва вилоятида ҳалокатга учраганди
12 июль куни йўловчисиз самолёт Москва вилоятининг Коломенск туманида ҳалокатга учраганди. Оқибатда борткузатувчи ва икки учувчи ҳалок бўлган. Лайнер 2014 йилда чиқарилган ва “Газпром” компаниясига тегишли бўлиб, 2019 йилдан бери учта техник носозликлар ҳақида хабар берилган.
Масалан, 2019 йилда самолётнинг чап двигатели реверси ишга тушмагани, 2022 йилда кондиционерлаш тизими ишдан чиққани, 2023 йилда эса ёнилғи миқдорининг озлиги сабабли Янги Уренгой аэропортига мажбурий қўниш амалга оширгани маълум бўлди.
Изоҳ (0)