Олтой Республикасининг Онгудай туманида “Путин қароргоҳи” номи билан танилган “Газпром” биноси ёниб кетгани айтилмоқда. Бу ҳақда Навальнийнинг “Сирена” жамоаси хабар берди.
Ёниб кетган бино суратларини блогер Амир Айташев ва фаол Аруна Арна эълон қилган. Суратлар турли бурчаклардан олинган. Айташевнинг таъкидлашича, у эълон қилган сурат 30 май куни олинган. Ёнғин сабаблари номаълум. Маҳаллий Фавқулодда вазиятлар вазирлиги россиялик журналистларга вазият юзасидан изоҳ беришдан бош тортган. Бино расман “Газпром”га тегишли бўлиб, санаторий-курорт мажмуаси ҳисобланади. Норасмий равишда у “Путин дачаси” деб аталади.
Комплекс кийикларнинг наслчилик фермасини ўз ичига олади. “Проект” нашри 2022 йилда Путиннинг соғлиғига оид текширувни эълон қилганида, Россия президенти бу жониворлар шохлари экстрактидан ванна қабул қилишини ёзганди. Мазкур дача қурилиши ҳақида маълумот 2010 йилда пайдо бўлган. Унинг қурилишига қарийб 3 миллиард рубль сарфланган.
2011 йилда “Новая газета” мухбирлари мажмуага киришга ҳаракат қилган, бироқ қўриқчи “иншоот давлатнинг юқори мартабали амалдорлари дам олиши учун мўлжалланганини” тушунтириб, уларни ортга қайтарган. Ўшанда “Газпром” бу қароргоҳ “бизнес ҳамкорлар билан учрашувлар, корпоратив тадбирлар ва хорижий меҳмонларни қабул қилиш” учун зарурлигини билдирган.
-u_87Tu_T.jpg)
Мажмуа Путинга алоқадорлиги ҳақида мухолифат вакиллари маълум қилган. Турли манбаларга кўра, бу ерда 100 минг кишини сиғдира оладиган “Путин бункери” ҳам мавжуд, аммо бу маълумот ҳали тасдиқланмаган.
Изоҳ (0)