“Газпром” Қирғизистон билан Қозоғистон орқали газ етказиб бериш бўйича 15 йиллик шартномалар тузди. Бу ҳақда компания матбуот хизмати хабар берди.
Тегишли шартномалар Санкт-Петербург халқаро иқтисодий форуми (СПИЭФ 2024) доирасида “Газпром экспорт” ва “Газпром Қирғизистон” МЧЖ ўртасида имзоланган. Ушбу шартномалар бўйича етказиб бериш 2025–2040 йилларда амалга оширилади.
“Газпром” Қозоғистоннинг QazaqGaz нефть компанияси билан Россия газини Ўзбекистон ва Қирғизистонга ташиш бўйича хизматлар кўрсатиш юзасидан узоқ муддатли шартномалар имзолаган. Ушбу шартномаларнинг амал қилиш муддати ҳам 2025–2040 йилларни ташкил этади.
“Транзитни таъминлаш учун, хусусан, “Марказий Осиё – Марказ” газ қувурлари тизими негизида махсус ажратилган маршрутни кенгайтириш, Қозоғистонда газ узатиш қувватларини ривожлантириш бўйича бошқа лойиҳаларни амалга ошириш кўзда тутилган”, — дейилади хабарда.
“Газпром” ўз хабарларида транзит ва таъминот ҳажмини кўрсатмаган. “Коммерсант” газетаси манбаларга таяниб хабар беришича, 2023 йилда Ўзбекистонга етказиб бериш нархи минг куб метр учун 160 долларни ташкил қилган.
Март ойида Қирғизистон энергетика вазири ўринбосари Талайбек Бойғозиев Қирғизистон “Газпром” билан 0,5 миллиард куб метрдан ортиқ газни етказиб бериш масаласини муҳокама қилаётганини айтганди. Унинг аниқлик киритишича, республика ҳозирда йилига қарийб 300–340 миллион куб метр газ импорт қилади ва яқин келажакда бу ҳажмни 1 миллиард куб метрга етказишни режалаштирмоқда.
2023 йил охирида “Газпром” раҳбари Алексей Миллер Қирғизистон, Қозоғистон ва Ўзбекистон билан 15 йиллик шартномалар тузилганини эълон қилганди. У шартномалар бўйича Марказий Осиё республикаларига барқарор етказиб бериш 2025 йил 1 ноябрдан бошланишини маълум қилган.
Изоҳ (0)