11 февралга ўтар кечаси Россия ҳарбий кучлари Украина ҳарбий-саноат комплекси фаолиятини таъминловчи Украина газ-энергетика мажмуаси объектларига ракеталардан гуруҳли зарба берди. Бу ҳақда Россия Мудофаа вазирлиги хабар берди.
Зарбадан кўзланган мақсадларга эришилди, дея таъкидлади ҳарбий идора.
Украина энергетика вазири Герман Галушченко мамлакат газ инфратузилмаси яна ҳужум нишони бўлганини тасдиқлади.
Хавфсизлик масаласи ҳал қилингач, ҳужум оқибатлари аниқланади, деди у.
Кейинроқ “Нафтогаз Украина” Полтава вилоятидаги ишлаб чиқариш қувватларига зарар етгани, аммо жабрланганлар йўқлиги ҳақида маълум қилди. Шунингдек, вилоят маъмурияти зарба оқибатида Полтава вилоятининг Миргород туманидаги тўққизта аҳоли пункти газ таъминотисиз қолганини хабар қилди.
Украина армияси Ҳарбий-ҳаво кучлари маълумотларига кўра, Россия жанговар авиацияси Украина ҳудудига жами 19 та қанотли, баллистик ва бошқариладиган ракеталарни учирган. Бундан ташқари, ҳаво ҳужумига 124 та Shahed ҳужумчи дрони жалб қилинган, улардан 57 таси уриб туширилган ва яна 64 таси жойлашувини йўқотган. Зарбалар Полтава, Чернигов, Харьков ва Черкас вилоятларига зарар етказган.
Бу Россиянинг Европага ёқилғи транзити тўхтатилганидан кейинги Украина газ-энергетика инфратузилмасига иккинчи ҳужуми бўлди. Биринчи оммавий ракета ҳужуми жорий йилнинг15 январь куни амалга оширилганди. Ўшанда Россия Мудофаа вазирлиги ҳарбийлар Украина армиясининг Краснодар ўлкасидаги “Турк оқими”га газ етказиб берувчи “Русская” компрессор станциясига ҳужум қилишга уринишига жавобан зарба берганини таъкидлаган эди.
1 январь куни Россия газини Украина орқали Ғарбий ва Марказий Европага етказиб бериш бўйича беш йиллик шартнома муддати тугади. Россия президенти Владимир Путин келишувни узайтиришнинг иложи йўқлигини тан олди. Унинг сўзларига кўра, гарчи Россиядан йилига тахминан 700-800 миллион доллар олган бўлса-да, айнан Украина томони бундай имкониятдан воз кечган.
Майли, биз омон қоламиз, “Газпром” бунга бардош беради, деди Путин ва қувур орқали етказиб бериш ўрнига суюлтирилган табиий газ экспортини оширишга ваъда қилди.
Украина Россия гази транзити тўхтатилгандан сўнг Польша билан ҳамкорликда Европа давлатларини ёқилғи билан таъминлаши керак бўлган Шарқий Европа газ хабини яратиш устида иш бошлагани маълум қилинди. Украина энергетика вазири ўринбосари Николай Колесникнинг сўзларига кўра, Украина ерости газ омборлари ва Польша суюлтирилган табиий газ терминаллари Россиядан газ етказиб бериш йўналишига муқобил янги бизнес модели учун асос бўлиши мумкин.
Изоҳ (0)