Украина президенти Владимир Зеленский Россия газининг Украина орқали транзитини тўхтатиш Владимир Путиннинг энг катта мағлубиятларидан бири бўлганини айтди. Бу ҳақда Deutsche Welle хабар берди.
“Москванинг энг йирик мағлубиятларидан бири”
Путинга 25 йилдан ортиқ вақт олдин Россияда ҳокимият инъом этилганида, Украина ҳудуди орқали Европага йилига 130 миллиард кубометрдан кўпроқ газ етказиб бериларди. Бугунги кунда Россия газининг транзити нолга тенг. Бу Москванинг энг катта мағлубиятларидан биридир. Энергия манбаларини қуролга айлантириш ва ҳамкорларни энергетик шантаж қилиш — Россияни ўзи учун энг жозибадор ва географик жиҳатдан энг қулай бозордан маҳрум қилган нарса, деди Зеленский.
Сиёсатчи Европанинг аксарият давлатлари бундай ўзгаришларга муваффақиятли мослашганини айтди. У АҚШдан Европа шттифоқига суюлтирилган табиий газ етказиб бериш кўпайишига умид билдирди.
Бугун бизнинг умумий вазифамиз - энергетика трансформацияси даврида Молдовани қўллаб-қувватлаш. Шунингдек, биз шаффоф энергетика сиёсати ўрнига Москва билан мафиявий схемаларни афзал кўрадиган айрим европалик сиёсатчиларнинг “истерикасига” бардош беришимиз керак. Бозорда Европанинг ҳақиқий ҳамкорларидан келган газ қанчалик кўп бўлса, Европанинг Россияга энергетик қарамлигининг сўнгги салбий оқибатлари шунчалик тезроқ бартараф этилади, дея қўшимча қилди Украина президенти.
“Газпром” Украина орқали газ транзитини тўхтатди
1 январь куни “Газпром” Украина орқали газ етказиб беришни бутунлай тўхтатди, чунки “Украина Нафтогози” билан беш йиллик транзит шартномаси тугади. Россия концернининг таъкидлашича, Киев шартномани узайтиришдан бош тортган, шу сабабли “Газпром” газни етказиб бериш учун “техник ва юридик имкониятлардан маҳрум”.
Изоҳ (0)