7 октябрь куни Россия президенти Владимир Путин 70 ёшини нишонлади. «Досье» маркази президент қабулхонасидаги манбасига таяниб, юбилей учун тақдим этилган совғалар ҳақида маълумот берди.
Қўшни мамлакатлар раҳбарларидан совғалар
Россия президенти ўз юбилейини Санкт-Петербургда, энг яқин қўшнилари — Беларусь, Тожикистон, Ўзбекистон, Туркманистон, Озарбайжон ва Арманистон раҳбарлари даврасида нишонлади. Улар ўз совғаларини шахсан топширишга муваффақ бўлди.
Хусусан, Тожикистон президенти Эмомали Раҳмон тарвуз ва қовунлардан иборат пирамида, Беларусь раҳбари Александр Лукашенко уч қути алкоголь, шоколад ва пишлоқ-колбасадан иборат сават, шунингдек, трактор учун сертификат ҳадя қилди. Туркманистон президенти Сердар Бердимуҳамедов юбилей эгасига 30 қути мева, сабзавот ва ёнғоқлар тақдим этди. Озарбайжон президенти Илҳом Алиев ҳам озиқ-овқатлардан иборат сават совға қилган.
Ўзбекистон президенти Шавкат Мирзиёев Путин билан учрашув чоғида айнан қандай совғани топширгани номаълум, бироқ Россия раҳбарининг туғилган куни арафасида уни олий даражали «Дўстлик» ордени билан мукофотлаганди.
Россия президенти икки мамлакат халқлари ўртасидаги анъанавий дўстлик ва ҳамкорлик ришталарини ривожлантириш ҳамда таваллудининг 70 йиллик юбилейи муносабати билан мукофотланган.
Чет эл етакчиларидан қандай совғалар келди?
«Путинни юзма-юз табриклаш шарафига муваффақ бўлмаганлар ўз қутловларини президент қабулхонасига юбормоқда», — дейилади «Досье» хабарида.Хусусан, Вьетнам президенти Нгуен Суан Фук россиялик ҳамкасбига ипак бўйинбоғ ва ўрта асрларга хос Вьетнам кемасининг қўлда ясалган ёғоч моделини юборган.
Қозоғистон собиқ президенти Нурсултон Назарбоев ўз профили ва дастхати туширилган медальон туҳфа қилди. Унга қўшимча равишда икки етакчи бирга тушган суратлардан иборат альбом ва шифобахш дамламалар тўпламини жўнатди.
ХХР етакчиси Си Цзиньпин номидан Хитой гулдони, дамламалар тўплами ва қайин дарахтлари тасвирланган ва шойидан ишланган сурат етиб келган.
Ҳиндистон бош вазири Нарендра Моди гуллардан ясалган ва ҳинд байроғи рангларига монанд пирамида тақдим этди.
Россиялик мансабдорлар ҳам Путинни совғасиз қолдирмади
Россия Хавфсизлик кенгаши раиси ўринбосари Дмитрий Медведев президент қабулхонасига мисга ўйиб ишланган Екатеринослав ноиблигининг 1792 йилги харитасини юборди. Ушбу ноиблик ўз ичига жануби-шарқий Украинани олган, шу жумладан, айни пайтда Россия армияси эгаллаб олишга уринаётган Мариуполь, Херсон, Полтава, Кременчуг ҳам унга кирган.
Шунингдек, Путин Марказий банк раҳбари Элвира Набиуллинадан «Пётр I — қайта қурувчи» кумуш тангасини, «Газпром» раҳбари Алексей Миллердан Пётр Биринчи ҳақидаги китобни, Ташқи разведка хизмати директори Сергей Наришкиндан маркалар ва тилла тангалар тўпламини, Тергов қўмитаси раҳбари Александр Бастрикиндан қўл соатини, бош прокурор Игорь Красновдан ўроғлиқ хатни, Ксения Собчакнинг онаси, сенатор Людмила Нарусовадан эса Сибирь метеоритидан ясалган ва ҳақиқий мамонт дандон тишлари билан безатилган мамонт ҳайкалини қабул қилиб олди.
Изоҳ (0)