Вашингтон 10 январь куни Москвага нисбатан янги чекловлар жорий этганидан сўнг, Россия нефтини олиб кетаётган камида 65 та танкер Хитой, Сингапур ва Россия қирғоқларида тўхтаб қолди. Бу ҳақда Reuters кема кузатуви маълумотларига таяниб хабар бермоқда.
Бешта танкер Хитой қирғоқларида, яна еттитаси Сингапур яқинида, қолганлари Болтиқ денгизи ва Узоқ Шарқда қолиб кетган, деб ёзади агентлик.
Булар қаторига, жумладан, Эрон портлари ва Сувайш канали яқинида боғлаб қўйилган 25 та нефть танкери ҳам киради.
13 январь куни икки миллион баррелдан ортиқ Россия нефтини олиб кетаётган учта танкер Хитой қирғоқлари шарқидаги сувларида шамол таъсирида сузаётгани маълум бўлди. Bloombergъга кўра, бу Шандун провинцияси портларини бошқарувчи компания санкция остидаги танкерларни қабул қилишни тақиқлаганидан кейин содир бўлган.
Агентлик маълумотларига кўра, Россия нефтининг яна бир йирик харидори ҳисобланувчи Ҳиндистон ҳам АҚШ санкциялари остида қолган танкерларни туширишдан бош тортади. 10 январга қадар ижарага олинган кемалар бундан мустасно бўлиб, улар 12 мартга қадар юксизлантирилиши керак. Бундан ташқари, Ҳиндистон банклари нефть санкция остидаги етказиб берувчилардан киритилмаслигини кафолатлаш мақсадида нефтнинг келиб чиқиши тўғрисидаги сертификатларни талаб қилади.
Жорий йилнинг 10 январь куни Қўшма Штатлар Россиянинг икки йирик нефть экспортчилари – “Газпром нефть” ва “Сургутнефтегаз”га қарши блокловчи санкциялар киритди. Уларга, бошқа ўнлаб компаниялар қатори, энди доллар ёки Америка молия тизимидан фойдаланган ҳолда молиявий операцияларни амалга ошириш тақиқланган.
Санкциялар, шунингдек, Россиянинг энг йирик юк ташиш компанияси – Sovcomflotга нисбатан кенгайтирилди. Чекловлар турли мамлакатлар байроқлари остидаги 183 та танкерга тааллуқли бўлиб, улар Ғарб санкцияларини бузган ҳолда Россия нефть ва нефть маҳсулотларини олиб ўтаётгани айтилмоқда.
Изоҳ (0)