Украина 2025 йил 1 январь куни эрталаб соат 7 да Россия газининг транзитини тўхтатади, чунки 5 йиллик шартнома муддати тугайди.
Бу ҳақда Украина бош вазири Денис Шмигал Олий Рададаги чиқиши чоғида маълум қилган.
Биз ҳаммамиз яхши биламизки, газ транзити бўйича келишув 2025 йил 1 январда тугайди. Шартнома якунланиши сабабли эрталаб соат 7 да транзит тўсиб қўйилади”, деди у.
Шмигалнинг сўзларига кўра, Украина газ транспорт тармоғи орқали транзитни қайта тиклаш мумкин, фақат битта шарти бор: бу Россия гази бўлмаслиги керак.
Шмигал нефть транзити бўйича ҳам айтиб ўтди. Бош вазирнинг сўзларига кўра, Украина Европа энергия хартиясига мувофиқ Россия нефтининг транзитини давом эттиришга мажбур.
Украина 2022 йил февраль ойида Россия билан газ ва нефть транзитидан ташқари ҳар қандай савдо операцияларини тақиқлашни жорий қилди. “Нафтогаз” ва “Газпром” ўртасидаги транзит шартномаси 2019 йил охирида беш йил муддатга тузилганди.
Украина оммавий ахборот воситаларининг ёзишича, жорий йилнинг ноябрь ойида “Нафтогаз” “Газпром”дан декабрь ойида транзит учун тахминан 70 миллион доллар миқдоридаги сўнгги траншни олган.
Кеча 19 декабрь куни Украина президенти Владимир Зеленский ҳукумат Россияга “украинлар қонидан қўшимча миллиардлаб даромад олиш имконини бермаслигини”, шунинг учун Россия газининг транзити тўхтатилишини таъкидлаганди.
Унинг қўшимча қилишича, Россиядан арзон нарса олиши мумкин бўлган дунёдаги ҳар қандай мамлакат “бир кун келиб Россияга қарам бўлади”.
Мен Словакия бош вазири билан суҳбатлашдим ва унга тушунтирдим: агар транзит қилинадиган газ Россия гази бўлмаса, биз қарши бўлмаймиз. Фақат аниқ билишимиз керак. Биз алданишни истамаймиз, яъни бу бошқа мамлакат бўлиб, у Россиядан газ олиб, кейин ўз газини транзит қилиши мумкин. Бу худди урушдан фойда кўришни ва Россияга пул ўтказишни давом эттиришга ўхшайди, деди Зеленский.
Изоҳ (0)