“Газпром”: Ўзбекистонга газ максимал даражада етказиб берилмоқда

“Газпром” 2024 йилнинг январь—август ойларида Марказий Осиёга газ етказиб беришни икки баравар оширди. Бу ҳақда компания раҳбари Алексей Миллерга таяниб, “ТАСС” хабар берди.

“Ушбу республикалар иқтисодий ва ижтимоий жиҳатдан жуда жадал ривожланмоқда. Бу эса бизга янги имкониятлар очмоқда. Биргина январь—август ойларида, саккиз ой ичида, ушбу минтақага газ етказиб беришни икки бараварга оширдик”, деди Миллер.

У Марказий Осиё мамлакатларида энергия ресурслари истеъмоли жуда юқори суръатлар билан ўсаётгани, Ўзбекистонга газ етказиб бериш ҳозирда максимал даражада кетаётганини айтди.

Масалан, ҳозирги пайтда Ўзбекистонга газ етказиб бериш учун биз қондираётган буюртмалар “Марказий Осиё — Марказ” газ қувури орқали техник жиҳатдан мумкин бўлган максимал даражада амалга оширилмоқда. Бу қишки даражада бўлиб, ўтган қишда Ўзбекистонда аномал кучли совуқ бўлганда, биз у ерга газ етказиб берган даражага тенг, деди Миллер.

Қирғизистон ҳақида гапирар экан, Миллер мамлакатда газлаштириш даражаси икки баравар ошгани, “Газпром Қирғизистон”нинг натижаларини “жуда яхши” эканини айтди.

Қирғизистоннинг газ транспорт тизимини реконструкция қилиш бўйича улкан ишлар амалга оширилди. Янги газ узатиш иншоотлари барпо этилди. Аммо шуни ҳам таъкидлаш жоизки, “Газпром Қирғизистон” компанияси “Газпром”да одат тусига кирганидек, Қирғизистонда ижтимоий аҳамиятга молик лойиҳаларни ҳам амалга оширди, деди у.

“Газпром” раҳбари Қирғизистонда газ истеъмоли ўсишда давом этаётганини айтди. 

• Июнь ойида “Газпром” Қирғизистонга газ етказиб бериш, шунингдек, Қозоғистон билан 2025—2040 йиллар давомида Ўзбекистон ва Қирғизистонга Россия газининг транзити бўйича битимлар имзолади.
• Транзитни таъминлаш учун “Марказий Осиё — Марказ” магистрал газ қувурлари тизими негизида махсус ажратилган йўналиш кенгайтирилади, шунингдек, Қозоғистоннинг газ узатиш қувватларини ривожлантириш бўйича бошқа лойиҳалар амалга оширилади.