Хитой ва Ҳиндистон АҚШ санкциялари таъсир қилмаган танкерлар учун юк ташиш нархининг ошиши фонида март ойида етказиб бериладиган Россия нефтини харид қилишни тўхтатди. Бу ҳақда трейдерларга таяниб, Reuters хабар бермоқда.
Тинч океанидаги Козмино портидан экспорт қилинадиган Россиянинг ESPO нефти нархи ICE Brent билан солиштирганда баррелига 3-5 долларга қимматлашди. Бу кема чартер ставкаларининг кескин ошиши билан боғлиқ. Масалан, Аframax типидаги танкер учун Хитой йўналиши бўйича нархлар бир неча миллион долларга ошган.
Жорий йилнинг 10 январь куни Қўшма Штатлар Россиянинг нефть ва газ экспортидан тушадиган даромадига таъсир кўрсатувчи Америка санкцияларининг шу кунгача энг кенг қамровли пакетини жорий қилди. Чекловлар Россиянинг тўртта йирик нефть компаниясидан иккитаси – “Газпром нефть” ва “Сургутнефтегаз”га ҳамда Ғарб санкцияларини бузган ҳолда Россия нефть ва нефть маҳсулотларини ташиётган 180 дан ортиқ танкерларга тааллуқли эди. Чекловлар танкер юклари нархининг ошишига олиб келди, чунки Хитой ва Ҳиндистондаги баъзи харидорлар ва портлар санкцияланган кемаларни қабул қилишдан бош торта бошлади.
Ҳиндистоннинг Bharat Petroleum Cоrp Ltd компаниясининг бош молиявий директори компания ҳар ойнинг ўрталарида бўлгани каби март ойида етказиб бериш бўйича ҳеч қандай янги таклиф олмаганини айтди.
Россия нефти 2024 йилда Ҳиндистон импортининг 36 фоизини ва Хитой импортининг деярли бешдан бир қисмини ташкил этди.
Кплер таҳлилий фирмаси маълумотларига кўра, сўнгги санкциялар Россиянинг денгиздаги нефть экспортининг қарийб 42 фоизини, асосан, Хитойга ташийдиган танкерларга таалуқли. АҚШ аввалроқ Ҳиндистондан 27 февралгача Россия нефти юкланган танкерларни туширишни ва 12 мартгача улар учун тўловларни амалга оширишни талаб қилган эди. Хитойда ҳам вақтинчалик санкциялар енгиллашганига қарамай, чекланган кемалар нефтни туширишда кечикишларга дуч келмоқда.
Kpler'нинг аниқлик киритишича, Хитойнинг Россиядан хом нефть импорти ўтган ҳафта олти ойлик энг паст даражага тушиб, кунига 717 минг баррелни ташкил қилган.
Ҳиндистонга келсак, Россия хом нефтини етказиб беришда кунига 450 минг баррелгача узилишлар кузатилмоқда, дея қайд этади Reuters.
Агентликка кўра, Ҳиндистон нефтни қайта ишлаш заводлари март ва апрель ойлари учун Яқин Шарқ, Африка ва АҚШдан муқобил етказиб беришни қидирмоқда, чунки улар Россиядан етказиб бериш қисқаришини тахмин қилмоқда.
Изоҳ (0)