“Газпром” Россиянинг Украинага босқини ортидан “бизнес модели барбод бўлганидан” сўнг, компанияни рекорд даражадаги зарарлардан “ўнглаб олиш” имконини берувчи ислоҳотларни режалаштирмоқда. Бу ҳақда Financial Times (FТ) хабар берди.
FТ “Газпром трансформацияси” деб номланган 42 саҳифали тақдимот билан танишиб чиқди. Унда компаниянинг асосий муаммолари — таъминот занжирларининг узилишидан тортиб Европа бозорига киришнинг чекланишигача бўлган масалалар муҳокама қилинган. 2024 йили тайёрланган ҳисоботда, келаси йил Европа ва Туркияга газ етказиб бериш ҳажми 2019 йилдаги кўрсаткичга нисбатан 5 баробардан кўпроқ камайиши таъкидланган.
“Газпром” компаниясини ислоҳ қилиш вазифаси бош директор ўринбосари Елена Илюхинага юклатилди. Financial Times маълумотига кўра, у “Газпром”нинг тарқоқ бўлинмаларини ягона вертикал интеграцияланган компанияга бирлаштиришни режалаштирмоқда. Бу эса “Газпром”нинг энг даромадли бўлинмаси – “Газпром Нефть” устидан назоратни кучайтиришни англатади. Илюхина илгари ушбу бўлинманинг топ-менежери бўлган.
FТ ҳавола қилган тақдимотда харажатларни қисқартириш ҳам таклиф қилинган. Гап хизмат сафарлари, офисларни ижарага олиш ва давлат органлари билан алоқаларни ўрнатиш харажатлари ҳақида бормоқда. Яна бир чора-тадбир, масалан, метан ёнилғи қуйиш шохобчалари тармоғининг бир қисмини сотиш бўлиши мумкин.
Илюхина, шунингдек, бош офисда “Газпром” тарихидаги энг йирик ишчилар сонини қисқартиришни амалга оширишни таклиф қилди. Компания раҳбари Алексей Миллерга йўллаган мактубида у 1600 нафар ходимни (яъни 40 фоиздан сал камроғини) ишдан бўшатиш зарурлигини айтган. 2025 йил январь ойида Илюхина компаниянинг марказий аппарати ва Санкт-Петербург филиали ходимлари сонини бир ярим баравардан кўпроқ — 4100 дан 2500 кишигача қисқартиришни таклиф қилаётгани ҳақида хабар берилганди.
Таклифга кўра, компаниянинг камида учта бўлими, жумладан, 2022 йилда Ғарб технологияларига Россия муқобилларини излаш учун ташкил этилган бўлинмаси ёпилиши керак. Яна саккизта бўлинма, жумладан, ташқи иқтисодий алоқалар ва капитал таъмирлаш бўлимини бирлаштириш, юридик, солиқ ва ғазначилик бошқармалари функцияларини ягона марказга ўтказиш режалаштирилмоқда.
Financial Times маълумотларига кўра, Елена Илюхина “Газпром” таркибида 15 йилдан ортиқ вақт мобайнида ишлаган. У, хусусан, Санкт-Петербургдаги “Лахта маркази” қурилишини назорат қилган. FТ уни “Миллернинг сафдоши” деб атайди ва у Путиннинг собиқ ёрдамчиси Марина Енталцева билан дўст эканини таъкидлайди.
Илюхина энергияга тўла ва корпоратив сиёсатни яхши тушунади. У “Тахтлар ўйини”нинг шафқатсиз қаҳрамони Серсей Ланнистерга ўхшайди. Аммо ҳатто у ҳам бу ботқоқликни қўзғата олишига шубҳам бор, деди Илюхина билан илгари ишлаган суҳбатдош FТ билан суҳбатда.
2024 йил сентябрь ойида Forbes Россия компанияларининг соф фойда ҳажми бўйича 100 та энг йирик рейтингини эълон қилди. Унда илгари рейтингда пешқадам бўлган “Газпром” йўқ эди. Компания янги рўйхатдан рекорд даражадаги 583 миллиард рубль зарар билан чиқиб қолди. Зарар кўриб ишлаётган компаниялар рейтингида “Газпром” биринчи ўринни эгаллади.
2025 йил январида “Газпром” стратегик бўлими раҳбари Алексей Сахаров компания 2050 йилгача газ экспорти бўйича мутлақ монополия ҳуқуқини мустаҳкамлаш зарурлигини билдирди. У йирик инвестиция лойиҳаларини амалга ошириши учун Россияда газ нархини оширишни таклиф этди.
Изоҳ (0)