Ҳиндистон 27 февралгача АҚШ санкцияларига учраган Россия танкерларидан нефтни тушириши ва 12 мартгача улар билан барча молиявий операцияларни якунлаши лозим. Бундай муддатларни АҚШ Молия вазирлигининг Хорижий активларни назорат қилиш бошқармаси (OFAC) белгилади.
Тегишли тушунтиришлар Ҳиндистон нефть вазирлигига етказилгани ҳақида унинг раҳбари Панкаж Жаин маълум қилди, деб хабар бермоқда Reuters.
Панкаж Жаин Ҳиндистон Россия нефтини Ғарб томонидан белгиланган бир баррел учун 60 долларлик нарх чегарасидан паст нархда ҳамда ташишда санкциялар остидаги компаниялар ва кемалар иштирок этмаса, сотиб олишни давом эттиришини таъкидлади.
Жорий йилнинг 10 январь куни АҚШ Россиянинг нефть секторига қарши кенг кўламли санкцияларни жорий этганди. Чекловлар “соя флоти”нинг 180 дан ортиқ танкерлари, “Газпром нефть”, “Сургутнефтегаз”, йирик суғурта компаниялари (“Алфа-суғурта” ва “Ингоссуғурта”), шунингдек, нефть-газ компанияларининг олтита юқори лавозимдаги менежерларини қамраб олди. Rystad Energy баҳолашича, бунинг оқибатида Ҳиндистон кунига 500 минг баррелгача хом ашёдан маҳрум бўлиши мумкин.
Украинада уруш бошланганидан сўнг Ҳиндистон катта чегирма билан сотиладиган Россия нефтининг энг йирик харидорига айланди. 2024 йил якунларига кўра, Москва Нью-Деҳлига кунига 1,7 миллион баррел ёки ушбу ресурснинг деярли ярмини экспорт қилган.
Санкциялар ҳақида нефтни қайта ишлаш заводлари март ойи учун харидларни келишаётган пайтда маълум бўлди, бу уларни зудлик билан муқобил етказиб берувчиларни излашга мажбур қилди, дейилади хабарда.
Reuters маълумотларига кўра, Ҳиндистон заводлари аллақачон Уммон ва БААдан хом ашё сотиб олиш бўйича келишувга эришган. Шунингдек, вазиятдан хабардор Platts манбаси Саудия Арабистони билан музокаралар бошлангани ва Ғарбий Африкада вазият ўрганилаётгани ҳақида хабар берди.
Ҳиндистоннинг энг йирик нефтни қайта ишлаш компанияси Indian Oil Corporation мамлакатнинг потенциал етказиб берувчилари қаторига ОПЕК, АҚШ, Гайана ва Бразилияни киритди.
Умуман олганда, Америка санкцияларининг кучайтирилиши туфайли Россия кунига 800 минг баррелгача нефть экспортини йўқотиши мумкин, деб баҳолаган эди “Алфа-банк” таҳлилчилари.
Бу мамлакатдан денгиз орқали олиб чиқиладиган ҳар учинчи баррел ва Халқаро энергетика агентлиги кунига 5 миллион баррел деб баҳолайдиган умумий экспортнинг ҳар еттинчи баррелига тўғри келади.
Изоҳ (0)