Венгрия ташқи ишлар вазири Петер Сиярто Украина Европа иттифоқи иқтисодиётини қийин аҳволга солиб қўйганини айтди.
Унинг маълумотларига кўра, Киев Россия газини транзит қилишдан бош тортаётгани маълум бўлган декабрь ўрталаридан бери газ нархи 20 фоизга ошган.
“Украина Европа иттифоқига номзод сифатида аъзо бўлишга интилаётган бўлса-да, ўзининг сўнгги қарори билан Европа иқтисодиётини яна оғир аҳволга солиб қўйди”, деб ёзди Сиярто Facebook’даги саҳифасида.
Вазирнинг айтишича, Украина орқали газ транзитининг тўхтатилиши Венгрияга жиддий зарар етказмаган. Аммо, унинг фикрича, Киевнинг қарори нархларнинг янада кўтарилишига олиб келади ва Европа иттифоқининг рақобатбардошлигига зарба беради.
2025 йил бошида Европа аукционларида газ нархи 2023 йил октябрь ойидан бери энг юқори даражага кўтарилди — 1000 куб метр газ нархи 540 АҚШ долларини ташкил қилди.
1 январь куни “Газпром” Украина орқали газ етказиб беришни бутунлай тўхтатди, чунки “Украина Нафтогаз”и билан беш йиллик транзит шартномаси тугади. Россия концернининг таъкидлашича, Киев шартномани узайтиришдан бош тортган, шу сабабли “Газпром” газни етказиб бериш учун “техник ва юридик имкониятлардан маҳрум”.
Изоҳ (0)