Европа билан газ урушидан кейин экспортнинг деярли 60 фоизини йўқотган ва Хитой билан янги шартнома имзоланишини кутмаган “Газпром” маиший техника ишлаб чиқаришга қарор қилди. Бу ҳақда “Коммерсант” хабар берди.
Россия газ монополиясининг шўба корхонаси ҳисобланган “Газпром маиший тизимлари” АЖ шу йилдан кир ювиш машиналари ва музлатгичлар ишлаб чиқаради.
“Газпром” ёзда Bosch заводини қайта ишга туширмоқчи. Урушдан олдин бу корхона йилига 1 миллиондан ортиқ музлатгич ва кир ювиш машинаси ишлаб чиқарган, дейди манбалар.
Бироқ завод фаолиятини тиклашда дастурий таъминот билан боғлиқ муаммолар юзага келиши мумкин. Чунки Bosch компанияси Россиядан чиқиб кетган ва заводда ишлатиладиган дастурий таъминот лицензиясини ҳам ўзи билан олиб кетган.
“Газпром маиший тизимлари” аллақачон газ плиталарини ишлаб чиқармоқда. 2024 йили компания 6,6 миллиард рубль даромад ва 140 миллион рубль соф фойда кўрди.
Агар “Газпром” ўз бренди остида техника ишлаб чиқаришни бошласа, у Жанубий Кореянинг LG, Samsung, Хитойнинг Haier, Hisense ва бошқа компаниялари билан рақобатда ютқазади, Bosch бренди остидаги техника ҳали ҳам параллел импорт орқали етказиб берилмоқда ва ўз харидорига эга, бозор аллақачон шаклланган, дея огоҳлантирди Jacky’s маиший техника бренди асосчиси Гусейн Иманов.
“Газпром”нинг асосий газ савдоси 2024 йилда зарар билан якунланди. Жумладан, бир йил аввалги 695,57 миллиард рубль зарар ўрнига 1,076 триллион рублни ташкил этди. Украинага босқин бошланганидан кўп ўтмай, Европанинг аксарият давлатларини газдан узиб қўйган “Газпром” экспортнинг деярли учдан икки қисмини йўқотди: 2023 йилда унинг ҳажми 1985 йилдан бери энг паст даражага тушди — 69 миллиард куб метр.
Изоҳ (0)