“Газпром” компанияси молиявий инқирозга юз тутишини прогноз қилган Давлат думаси депутати Павел Завалний Энергетика қўмитаси раиси лавозимидан озод этилди. Бу ҳақда The Moscow Time хабар берди.
Россияда ҳукумат таркиби ўзгаргандан сўнг бошланган ва Сергей Неверовни вице-спикер лавозимига олиб келган Давлат думаси раҳбариятидаги ўзгаришлар тўлқини Энергетика қўмитасига етиб борди. 23 июль куни “Ягона Россия” аъзоси Павел Завалий Энергетика қўмитаси раиси лавозимидан четлаштирилди.
Газ соҳасида қарийб 30 йил ишлаб, компрессор станцияси муҳандисидан “Газпром” шўба корхоналарининг топ-менежеригача бўлган йўлни босиб ўтган Завалний 2015 йилдан буён қўмитага раҳбарлик қилган. Бундан аввал эса Россия газ жамиятини бошқарган. Унинг ишдан бўшатиш сабаблари Думада айтилмаган.
2023 йил Завалний Европадаги асосий экспорт бозорини йўқотган ва 1980 йилларнинг ўрталаридан бошлаб хорижда газ сотишни минимал даражага туширган “Газпром”нинг йирик молиявий муаммолари ҳақида баёнот берганди.
“Газ экспорти тушумлари ва газлаштириш мажбуриятлари камайиши туфайли ъГазпромънинг зарарлари 2025 йилга келиб 1 трлн рублга етиши мумкин. Экспорт бўлмайди, харажатлар эса қолди”, — деган Завалний.
Ўтган йил якунларига кўра, “Газпром” чорак аср ичида биринчи марта йиллик соф зарар кўрди ва унинг ҳажми компания мавжуд бўлган ўттиз йил ичида рекорд даражада — 629 миллиард рублга етди.
2019 йилда Завалний Россияда арзон нефть қазиб олинадиган конлар тугаб бораётгани, захиралар таннархи сезиларли даражада қимматлашаётгани, бундан ташқари, углеводородларга — Россия экспортининг асосий товарларига бўлган талаб доимий бўлмаслигини айтиб огоҳлантирди.
Изоҳ (0)