Европадаги савдоларда газ нархи 2 январь куни мегаватт/соат учун 50,3 еврогача (тахминан 1 минг куб метр учун 526 евро) кўтарилди. Bloomberg хабарига кўра, бу кўрсаткич 2023 йил октябридан бери газ нархининг энг юқори даражасидир.
Газ нархининг ошишига учта омил сабаб бўлмоқда. Биринчиси — Россиянинг “Газпром” компанияси Украина орқали Европага газ транзитини тўхтатди. Иккинчи сабаб — Норвегиянинг Хаммерфест шаҳридаги суюлтирилган табиий газ ишлаб чиқариш заводи компрессор носозлиги туфайли 9 январгача фаолиятини тўхтатди. Учинчи омил эса Шимолий Европадаги совуқ об-ҳаво бўлиб, бу минтақада иситиш учун газ сарфини оширди.
“Бу ҳафтада (Норвегиядан суюлтирилган табиий газ) таъминотининг қисқариши буфер вазифасини бажарадиган омборлардан газ оқимининг тезлашишига олиб келиши мумкин. Қитъа бўйлаб захиралар 2021 йилда газ инқирози эндигина бошланаётган пайтдан бери тез суръатда камайиб бормоқда”, деб ёзади Bloomberg.
Шунга қарамай, Европа комиссияси “минтақада ҳам, ундан ташқарида ҳам самарали тайёргарлик ишлари ва мувофиқлаштириш” туфайли Марказий ва Шарқий Европага газ етказиб бериш хавфсизлигига таҳдид йўқлигини таъкидлади.
“Газ етказиб бериш муқобил йўналишлар (Германия, Италия) ва омборлардан танлаб олиш орқали кафолатланади”, дейилади Европа иттифоқи ижроия органи веб-сайтида.
“Газпром” Украина орқали газ транзитини тўхтатди
1 январь куни “Газпром” Украина орқали газ етказиб беришни бутунлай тўхтатди, чунки “Украина Нафтогози” билан беш йиллик транзит шартномаси тугади. Россия концернининг таъкидлашича, Киев шартномани узайтиришдан бош тортган, шу сабабли “Газпром” газни етказиб бериш учун “техник ва юридик имкониятлардан маҳрум”.
Изоҳ (0)