«Газпром» Хитойга кунлик газ етказиб бериш бўйича янги рекорд ўрнатди

«Газпром» «Сибир қудрати» газ қувури орқали Хитойга кунлик газ экспорти бўйича янги тарихий рекорд ўрнатди. Бу ҳақда «РБК» хабар бермоқда. 

Компания раҳбари Алексей Миллернинг таъкидлашича, ўтган йили Хитой сўровига кўра етказиб беришлар мунтазам равишда кунлик шартнома миқдоридан ошиб кетган, бу эса йиллик мажбуриятларнинг ортишига олиб келган. 

«Бундан ташқари, хитойлик ҳамкасбларимизнинг илтимосига кўра, 31 декабрь куни, яъни муддатидан бир неча кун олдин келгуси йил учун шартномада белгиланган кунлик ҳажмларни етказиб беришни бошладик. Шундай қилиб, 2023 йил 1 январдан «Газпром» Хитойга газ етказиб беришнинг принципиал янги даражасига чиқди», — дейди Миллер.

«Сибир қудрати» қувури 2019 йилда ишга туширилган бўлиб, Хитойнинг CNPC компанияси билан шартнома асосида газ у орқали етказиб берилади. 

2021 йилда «Газпром» ушбу қувур орқали деярли 10,4 млрд куб метр газ етказиб берди., 2022 йилда 15 млрд куб метр газ етказиб бериш режалаштирилган эди. 2023 йилда эса бу кўрсаткич 22 млрд куб метр бўлиши кутилмоқда.

Аввалроқ Россия омборларидаги газ захираси тарихий максимал даражага етгани ҳақида хабар берилган эди.