Forbes журнали Россиянинг энг йирик компанияларининг соф фойда ҳажми бўйича йиллик рейтингини эълон қилди. Аввалги йиллар рўйхатда пешқадамлик қилиб келган “Газпром” концерни ҳатто биринчи юзталикка ҳам кира олмади.
Forbes маълумотига кўра, 2023 йили “Газпром” 583 миллиард рубль зарар билан якунлаган. Россиянинг “Коммерсант” нашри эса зарарни 629 миллиард рублга баҳоламоқда. Ҳар қандай ҳолатда ҳам, бу 25 йил ичидаги энг юқори кўрсаткич бўлиб, Россия газ концерни 1,23 триллион рубль фойда олган 2022 йилга нисбатан кескин тафовутни кўрсатади.
Компания муаммоларининг асосий сабаби энг кўп фойда келтирган Европа Иттифоқи бозорининг йўқотилиши экани айтилмоқда. “Коммерсант” маълумотларига кўра, 2023 йилда Европага қувур орқали газ етказиб бериш ҳажми бир йил аввалги 62 миллиард куб метрга нисбатан 24 миллиард куб метргача тушиб кетган. Ички ҳисоботга кўра, яқин йилларда Россия газ гиганти урушдан олдинги савдо ҳажмини тиклашга эриша олмайди.
Россиянинг энг даромадли компаниялари рейтингининг янги пешқадами “Роснефть” бўлди. У 2023 йил якунлари бўйича 1,529 триллион рубль соф фойда олишга эришди. Рейтингнинг энг яхши 100 та компаниясининг умумий даромади ўтган йилги 9,27 триллион рублга нисбатан 13,2 триллион рублдан ошган.
Изоҳ (0)