Amerika rahbariyati yaqin kunlarda Eronga zarba berish imkoniyatini jiddiy ko‘rib chiqmoqda. Bu haqda manbalarga tayanib Bloomberg xabar berdi.
Operatsiya 21—22-iyun, dam olish kunlari bo‘lib o‘tishi mumkin. Bir nechta federal agentliklarning yuqori martabali amaldorlari ehtimoliy hujumga tayyorgarlikni boshlagan. Biroq vaziyat doimiy ravishda o‘zgarib turgani sababli qarorlar qayta ko‘rib chiqilishi mumkin.
Hujum kechiktirilishi AQSH prezidenti Donald Tramp murosaga tayyor degan signalni yetkazishi mumkin. Bunday holda murosa Eron yadro dasturini qisqartirish va uranni boyitish quvvatlarining bir qismidan voz kechishni anglatadi, deyiladi xabarda.
CBS News nashri Pentagondagi manbalari va razvedka ma’lumotlariga tayanib xabar berishicha, Tramp Eronning Fordodagi yadroviy obyektiga aviazarba berish imkoniyatini dastlabki tarzda ma’qullagan. Biroq yakuniy qarorni hali qabul qilmagan.
Oq uy rahbari operatsiyaning ehtimoliy xatarlari haqida xabardor qilingan. Prezident Fordodagi zavodning ishdan chiqishini Eronning yadroviy qurol yaratishiga yo‘l qo‘ymaslik uchun zarur qadam deb hisoblaydi.
Shuni ta’kidlash kerakki, AQSH razvedkasi va MAGATE rahbari Eron yadro quroli yaratayotganiga oid dalillarni topmagan. Isroil esa yadro quroli yaratilayotgani da’vosi bilan Islom respublikasiga hujumlar qilmoqda.
Izoh (0)